Eyüb Mahkemesi (Havass-ı Refia) 3 Numaralı Sicil (H. 993 - 995 / M. 1585 - 1587) cilt: 22, sayfa: 173 Hüküm no: 267 Orijinal metin no: [28b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mihriban bt. Abdullah’ın mülk bahçesini Yasemin bt. Abdullah’a beş yıl önce sattığı Medîne-i Ebâ Eyyûb el-Ensârî mahallâtından El-Hâc Hüsrev mahallesinde sâkine Mihriban bt. Abdullah nâm hâtun meclis-i şer‘-i şerîfde işbu hâmilet-i hâze’l-kitâb Yasemin bt. Abdullah mahzarında ikrâr ve i‘tirâf edip bundan akdem mahalle-i mezbûrede vâki‘ bir tarafı Saka Hüseyin mülküne ve bir tarafı tarîk-i âma ve iki tarafı Ferid b. Abdullah mülküne müntehî olup tûlen dokuz zirâ‘ ve arzan bir zirâ‘ mikdârı bahçemi târih-i kitâbdan beş yıl mukaddem mezbûre Yasemin’e iki yüz râyic fi’l-vakt akçeye bey‘-i bât ile bey‘ edip kabz-ı semen ve teslîm-i mebî‘ ettim dedikde mukırra-i merkūme[yi] ikrâr-ı meşrûhasında mezkûre Yasemin vicâhen ve şifâhen tasdîk ve tahkīk edip mâ vaka‘a vukū‘u üzre gıbbe’t-taleb kayd olundu. Şuhûdü’l-hâl: Mustafa b. Mehmed el-İmâm, Veli b. Bayram, Yakub b. Ahmed, Halil b. Ahmed, Bâli b. Hüseyin, el-Hâc Kenan