Eyüb Mahkemesi (Havass-ı Refia) 3 Numaralı Sicil (H. 993 - 995 / M. 1585 - 1587) cilt: 22, sayfa: 174 Hüküm no: 269 Orijinal metin no: [28b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Murad Reis b. Receb’in Mahmud ve Pervâne adlı pazarcılara sattığı üzümün parasını istediği, verdiği üzümün eksik çıktığı Karamürsel nâm kasaba sâkinlerinden Murad Reis b. Receb nâm kimesne Küçük Karaman pazarcılarından Mahmud ve Pervâne nâm kimesneleri mahfil-i kazâya ihzâr ve bi’l-muvâcehe takrîr-i da‘vâ kılıp mezbûrlara on bir fıçı evenk üzümü verdim her bir fıçı yüz akçe hesâbı üzre cem‘an bin yüz akçe hakkım var taleb ederin dedikde gıbbe’s-suâl mezbûrlar vâkı‘a mezkûr Reis’den dokuz fıçı evenk aldık üç fıçısını yine kendi huzûrunda vezn eyledik üç fıçı altmış beş vakıyye çıktı ana binâen vermeziz dediklerinde merkūm Reis ben sizinle üç fıçıyı vezn edip eksik gelmedi haberim yokdur deyicek Reis-i mezbûr vezn olundukda bile hâzır olmadıkda yemîn billâh teklîf eylediklerinde vech-i meşrûh üzre hâzır olmadığına yemîn eyledikden sonra mezbûrların mukır oldukları dokuz fıçıyı yüzer akçe hesâbı üzre bey‘ eylediğine mesfûr Reis’den beyyine taleb olundukda medîne-i Ebâ Eyyûb el-Ensârî -aleyhi rıdvânü’l-meliki’l-Bârî-’de pazarbaşı olan Sefer ve Mahmud Çelebi b. Hüseyin nâm kimesneler şehâdet için hâzırân olup vâkı‘a mezbûr Reis mezkûrân Mahmud ve Pervâne’ye ve sâir pazarcılara getirtdiği evenk fıçılarını yüzer akçeye verdi biz dahi yüz akçeye aldık deyû edâ-i şehâdet-i şer‘iyye eylediklerinden sonra zikr olunan dokuz fıçı evenk bahâsından dokuz yüz akçe mezbûrlardan mesfûr Reis’e hükm olunup mâ hüve’l-vâki‘ bi’t-taleb kayd şüd. Şuhûdü’l-hâl: Bâli b. Hüseyin, Yusuf b. Abdullah, Mustafa b. Yusuf, Hacı Kenan, Abdi [b.] Mehmed