Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 159 Hüküm no: 113 Orijinal metin no: [15b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emta v. Hadar’ın ekmekçi fırınında kendine ait eşyaları, ortakları Manol v. Ovanes ile Bedros v. Şerit’e sattığı Ekmekçi tâifesinden Emta v. Hadar? nâm zimmî meclis-i şer‘-i şerîf-i şâmihü’l-imâd ve mahfil-i dîn-i münîf-i râsihü’l-evtâdda tâife-i mezbûreden şerîkleri işbu râfi‘ü’s-sifr Manol v. Ovanes ve Bedros v. Şerit nâm zimmîler muvâcehesinde bi’t-tav‘i’s-sâf ikrâr ve i‘tirâf edip bey‘-i âti‘z-zikrin sudûruna değin sülüs şâyi‘i benim ve sülüs şâyi‘i merkūm Manol’ün ve sülüs-i şâyi‘i mezbûr Bedros’un mülkümüz ve hakkımız olup Dârü’l-hilâfeti’l-aliyye Kostantıniyye el-mahmiyye’de Salmatomruk kurbunda Ali Paşa-yı Atîk mahallesinde vâki‘ sultânü’l-muhadderât tâcü’l-muvakkarât-ı aliyyetü’z-zât safiyyetü’s-sıfât Fâtıma Sultan -dâmet ismetühâ- hazretlerinin fırınlarında mevcûd olan yirmi re’s bârgir, kırk aded panakot ve yirmi aded tekne ve iki aded balta ve altı aded elek ve sâir beynimizde ma‘lûme ekmekçi tâifesine mahsûs olan âlât-ı lâzımeden vech-i meşrûh üzre mülküm ve hakkım olan sülüs hisse-i şâyi‘amı merkūmân Manol ve Bedros’a ale’l-iştirâki’s-seviy yüz elli kıt‘a esedî guruşa bi safkatin vâhidetin bey‘ ve teslîm edip anlar dahi vech-i muharrer üzre iştirâ ve kabûl ve kabz ve tesellüm eylediklerinden sonra semenleri olan meblağ-ı mezkûr yüz elli aded esedî guruşun yetmiş beş kıt‘asını merkūm Manol yedinden ve yetmiş beş kıt‘asını merkūm Bedros yedinden tamâmen alıp kabz eyledim ba‘de’l-yevm eşyâ-i mezkûrenin nısf-ı şâyi‘i merkūm Manol’ün ve nısf-ı şâyi‘-i âharı mezbûr Bedros’un mülk-i müşterâları olup eşyâ-i mezkûrede ve semenlerinde kat‘â benim alâka ve medhalim kalmamışdır dedikde, gıbbe’t-tasdîki’ş-şer‘î mâ hüve’l-vâki‘ bi’l-ibtigā ketb ve imlâ olundu. Fi’l-yevmi’t-tâsi‘ min Cumâdelûlâ li sene seb‘a ve seb‘în ve elf. Şuhûdü’l-hâl: Mustafa Efendi b. Durak el-İmâm, Yusuf Halîfe b. Abdullah el-Müezzin, es-Seyyid Ahmed Çelebi b. Nasrullah, iç edikçi Abdülkādir b. Halil, Abdullah b. Halil.