Eyüb Mahkemesi (Havass-ı Refia) 3 Numaralı Sicil (H. 993 - 995 / M. 1585 - 1587) cilt: 22, sayfa: 177 Hüküm no: 273 Orijinal metin no: [29b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Aynî Hâtun’un Kiremitçi Ahmed Mescidi Evkâfı’nın tevliyyetini vâkıfın şartına aykırı olarak yürüttüğü ve hizmetini ihmal ettiği Atabe-i aliyye-i hâkāniyye ve südde-i seniyye-i sultâniyye -lâ zâlet mahfûfeten bi’l-inâyeti’r-rabbâniyye ve’l-mehâbâti’s-sübhâniyye- cenâb-ı Refî‘a’ya arz-ı dâ‘î-i fakīr oldur ki Havâss-ı Kostantıniyye tevâbi‘inden karye-i Hasköy’de merhûm Kiremitçi Ahmed binâ eylediği mescidin evkāfı tevliyyetini yevmî altı akçe ile evvelen kendiye ve ba‘dehû evlâdının ebnâsına ve ebnâ-i ebnâsına ve ba‘de’l-inkırâz kızlarının ebnâsına şart eylediği vakfiye-i ma‘mûlün bihâsında mastûr ve mukayyed olduğuna ve hâmil-i rakk-ı salih bendeleri vâkıf-ı mûmâ-ileyhin sulbî oğlu olup tevliyyet-i mezbûra istihkākı var iken mezbûr Sâlih’in kız karındaşı Aynî Hâtun tevliyyet-i mezbûra hilâf-ı şart-ı vâkıf mutasarrıfe olduğundan gayrı hizmet-i lâzımesinde ihmâli vardır deyû mescid-i mezbûrun [imâmı] Halil b. Ali ve müezzini İsâ b. Sefer ve mahalle-i merkūmeden Ali b. Kasım ve Hürrem b. Abdullah ve Ali b. Abdullah ve Hüseyin b. Sefer ve Mustafa b. Abdullah ve Siyâmi b. Mustafa ve Ferhad b. Abdullah cemm-i gafîr haber vermeğin vâki‘ hâl Dersaâdet’e niyâbeten arz olundu, bâkī fermân Dergâh-ı mu‘allânındır. Tahrîren fi’l-yevmi’s-sânî aşer min Saferi’l-hayr min şuhûri seneti erba‘a ve tis‘în ve tis‘a mi’e. Şuhûdü’l-hâl: Musa Çelebi [b.] el-Hâc Ferhad, Bâli b. Hüseyin, Mustafa b. Yusuf, Mustafa b. İvaz, Eymir b. Üveys, el-Hâc Kenan b. Mustafa