Eyüb Mahkemesi (Havass-ı Refia) 3 Numaralı Sicil (H. 993 - 995 / M. 1585 - 1587) cilt: 22, sayfa: 180 Hüküm no: 281 Orijinal metin no: [30a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nişancı Paşa Câmi‘i Evkâfı’ndan olan çeşme ve hamamın tamiri gereken yerlerinin mütevellînin talebi ile keşfinin yapıldığı ve mâliyetinin tahmîn edildiği Medîne-i Ebâ Eyyûb el-Ensârî -aleyhi rıdvânü’l-meliki’l-Bârî-’de merhûm ve mağfûrun-leh Nişancı Paşa Câmi‘i evkāfı’na kāimmakām olan Durali b. Mustafa nâm kimesne meclis-i şer‘-i şerîfde takrîr-i kelâm edip vâkıf-ı mezbûrun câmi‘-i şerîf kurbunda vâki‘ olan çeşmenin ö[r]tüsü ve hamamı külhanının parsa delikleri ve dolab kapısının örtüsü harâba müşrif olup zikr olunan mahaller görülüp tahmîn olunmasın taleb ederim dedikde hâssa mi‘mârlardan Cafer Bey b. Pîrî ile ve mürtezikadan Mevlânâ Mazhar Halîfe el-Hatîb ve Ali b. Hamza el-Müezzin ve Mehmed b. Hüsam el-hâfız ve Sâlih b. Muhyiddin el-hâfız ve sâir müslümanlar kıbel-i şer‘-i şerîfden Mevlânâ Halil irsâl olunup üzerine vardıklarında zikr olunan çeşmenin pınarı örtüsü ta‘mîrine bin iki yüz akçe ve külhanın pınarı ta‘mîrine sekiz yüz akçe ve külhanın parsa deliklerine bin beş yüz akçe ve tüfenk deliklerini açmağa ve cehennemliğin ayırtlamağa bin akçe zikr olunan mahalleri ta‘mîr ve termîme mi‘mâr-ı mezbûr tahmîni ile dört bin beş yüz akçe tahmîn ettiklerini ihbâr ettikleri ecilden mâ vaka‘a gıbbe’t-taleb ketb olunup ve işbu sahîfe ber sebîl-i temessük ketb olunup kāimmakām-ı müşârün-ileyh yedine def‘ olundu ki lede’l-hâce ihticâc edine. Cerâ zâlike ve hurrire fî selhi Rebî‘ilevvel sene 994. Şuhûdü’l-hâl: Sinan Bey b. Abdullah, el-Hâc Hüseyin b. Abdullah, Pervâne Bey b. Abdullah, Ramazan b. Hüseyin, Murad b. Abdullah, İlyas b. Hızır, Ahmed b. Mehmed, Mehmed b. Hüseyin