Eyüb Mahkemesi (Havass-ı Refia) 3 Numaralı Sicil (H. 993 - 995 / M. 1585 - 1587) cilt: 22, sayfa: 180 Hüküm no: 280 Orijinal metin no: [30a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İstemade bt. Kostantin’in vakfa ait tasarrufundaki bostan yerini Dimitri v. Pavli’ye tefvîz ettiği Vech-i tahrîr-i hurûf oldur ki Hâslar kazâsına tâbi‘ Oklağılı nâm karye sâkinlerinden Dimitri v. Pavli nâm zimmî meclis-i şer‘-i şerîfde takrîr-i merâm edip bundan akdem dokuz yüz seksen üç senesinde karye-i merkūme sınırında vâki‘ olup sâhibine intimâ ile tahdîdden müstağnî olan bostan yerinin tasarrufunu karye-i mezbûreden İstemade bt. Kostantin nâm zimmiye izn-i mütevellî ile bana tefvîz edip bedel-i ferâgat-i hakk-ı tasarruf mezbûre İstemade’ye iki yüz akçe vermiş idim hâlâ mütevellîden izin verdiğine elimde temessük dahi vardır deyû târih-i merkūmda mütevellî olan fahrü’l-emâcid Mehmed Efendi’nin temessükün ibrâz edip takrîrine mutâbık bulunup ve mezbûre İstemade dahi fi’l-vâki‘ zikr olunan bostan yeri babam mezbûr Kostantin’den bana irs-i şer‘îyle intikāl etmeğin mesfûr Dimitri’ye izn-i mütevellî ile târih-i mezkûrda tasarrufunu tefvîz edip bedel-i ferâgat-i hakk-ı tasarruf iki yüz akçesin almış idim deyû mezbûre İstemade dahi ikrâr ettiğinde mukırra-i mezbûreyi vech-i meşrûh üzre mesfûr Dimitri tasdîk etmeğin vâki‘ hâl bi’t-taleb tenmîk olunup yed-i tâlibe vaz‘ ve ta‘lîk olundu tâ ki vakt-i hâcetde müzekkir-i hâl ola. Tahrîren fî gurreti Rebî‘ilâhir sene 994. Şuhûdü’l-hâl: Fahrü’l-emâsil Osman Çavuş b. Şaban, Mehmed b. Ali, Bâli b. Hüseyin, Mustafa b. Yusuf, Hüseyin b. Mehmed, kâtibü’l-hurûf Kurd Mehmed ve gayruhüm