Eyüb Mahkemesi (Havass-ı Refia) 3 Numaralı Sicil (H. 993 - 995 / M. 1585 - 1587) cilt: 22, sayfa: 183 Hüküm no: 283 Orijinal metin no: [31a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Hüseyin’in ölen Yasemin bt. Abdullah’ın vârisi olarak hak iddia ettiği evin Yasemin Hâtun tarafından sağlığında kocası Mustafa b. Abdullah’a satıldığı Budur ki medîne-i Ebâ Eyyûb Ensârî sâkinlerinden Bekri Mehmed b. Hüseyin nâm kimesne meclis-i şer‘-i şerîfde âti’z-zikr Yasemin bt. Abdullah nâm hâtunun sâbıkan zevci olan hâmil-i hâze’l-kitâb Mustafa b. Abdullah mahzarında takrîr-i da‘vâ eyledi ki bundan akdem mezbûre hâtun medîne-i merkūmede Emânî mahallesinde bir tarafı Hümâ Hâtun bt. Abdullah mülkü ve bir tarafı Saraylı demekle ma‘rûfe hâtunun mülkü ve bir tarafı tarîk-i hâs ile ve bir tarafı tarîk-i âm ile mahdûd olan mülke mutasarrıfe iken vefât edip zikr olunan menzilin nısfı usûbet-i sebebiyye cihetiyle bana âid iken mezbûr Mustafa hisse-i şâyi‘amı vermeyip fuzûlen tasarruf eder şer‘le görülmesin taleb ederim dedikde gıbbe’s-suâl merkūm Mustafa zikr olunan hâtun menzil-i mesfûru cümle tevâbi‘ [ve] levâhıkıyla hâl-i hayâtında ve kemâl-i sıhhatinde bana üç bin râyic fi’l-vakt akçeye bey‘ edip elime hüccet dahi vermişdir deyû bundan akdem medîne-i merkūmede nâibü’ş-şer‘ olan Mehmed b. Ferhad’ın hatt [ve] hatmini müştemil bir hüccet ibrâz edip ve mezbûr müdde‘î mazmûnun inkâr eyledikde udûl-i müslimînden mahalle-i merkūme imâmı Osman b. Ferhad ve Şuca‘ b. Abdullah ve Ahmed b. Abdullah ve Ferruh Bey b. Abdullah nâm kimesneler mazmûnuna ve mesfûre hâtun zikr olunan mülkü hâl-i hayâtında ve kemâl-i sıhhatinde merkūm Mustafa’ya üç bin akçeye bey‘ edip kabz-ı semen ve teslîm-i mebî‘ eylediğine şehâdet-i şer‘iyye edip gıbbe’t-ta‘dîli’ş-şer‘î şehâdetleri hayyiz-i kabûlde vâki‘ olmağın kayd-ı sicil olundu. Fî evâili Rebî‘ilâhir sene 994. Şuhûdü’l-hâl: Bâli b. Hüseyin, Mustafa b. Mehmed, Ferhad b. Abdullah, Mustafa b. Abdullah, Mustafa b. İvaz ve gayr