Eyüb Mahkemesi (Havass-ı Refia) 3 Numaralı Sicil (H. 993 - 995 / M. 1585 - 1587) cilt: 22, sayfa: 184 Hüküm no: 284 Orijinal metin no: [31a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Beytülmâl zâbiti Ahmed’in almak istediği Cafer b. Abdullah’ın mîrîye ait olan muhallefâtının önceki beytülmâl zâbiti tarafından Mehmed b. Hüseyin’e satıldığı Budur ki bi’l-fi‘l Edirnekapısı semtinde beytülmâl zâbiti Ahmed b. Abdullah? nâm kimesne mahfil-i kazâda hâmil-i hâze’l-kitâb Mehmed b. Hüseyin mahzarında takrîr-i da‘vâ eyledi ki bundan akdem medîne-i merkūmede vefât eden Cafer b. Abdullah nâm kimesnenin muhallefâtı mîrîye âid iken mezbûr Mehmed merkūm Cafer’in Emânî mahallesinde ma‘lûmetü’l-hudûd köhne duvar hissesin ve sâir esbâbın fuzûlen alıp kabz eylemişdir şer‘le görülmesin taleb ederim dedikde gıbbe’s-suâl mezbûr Mehmed zikr olunan Cafer vefât eyledikde ol zamânda Edirnekapısı semtinde beytülmâl zâbiti Süleyman b. el-Hâc Mehmed mesfûr Cafer’in zikr olunan duvarın ve mevcûd olan sâir esbâbın bana iki bin fıddî râyic fi’l-vakt akçeye bey‘ edip elimden semen-i merkūmu bî-kusûr alıp mülk-i müşterâmdır dedikde mezbûr Ahmed vech-i meşrûh üzre merkūm Mehmed’in iştirâsın inkâr eyledikde udûl-i müslimînden Şuca‘ b. Abdullah ve Ahmed b. Abdullah ve Ferruh b. Abdullah nâm kimesneler fi’l-vâki‘ mezbûr Cafer vefât edip muhallefâtı mîrîye âid olmağın ol zamânda Edirnekapısı semtinde beytülmâl zâbiti olan mezbûr Süleyman müteveffâ[-yı] merkūmun zikr olunan köhne duvar hissesin ve mevcûd olan esbâbın sâlifü’z-zikr Mehmed’e iki bin akçeye bey‘ edip kabz-ı semen ve teslîm-i mebî‘ eyledi deyû edâ-i şehâdet-i şer‘iyye edip gıbbe’t-taleb kayd-ı sicil olundu. Fî evâili Rebî‘ilâhir sene 994. Şuhûdü’l-hâl: Bâli b. Hüseyin, Mustafa b. Mehmed, Osman b. Ferhad el-İmâm, Ferhad b. Abdullah, Mustafa b. Abdullah ve gayr