Eyüb Mahkemesi (Havass-ı Refia) 3 Numaralı Sicil (H. 993 - 995 / M. 1585 - 1587) cilt: 22, sayfa: 185 Hüküm no: 287 Orijinal metin no: [31b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Çelebi’nin câriyesi ile kölelerinin Mahmud b. Mehmed’in evini basıp zevcesi Yasemin’i bağlayarak kilitli bir sandık ile elbiselerini gasb ettikleri Budur ki medîne-i Ebâ Eyyûb Ensârî sâkinlerinden bi’l-fi‘l Nakkaşbaşı mahallesinde sâkin olan Mahmud b. Mehmed nâm kimesne mahfil-i kazâya hâzır olup takrîr-i merâm eyledi ki hâlâ zevcem olan Yasemin bt. Abdullah evimde iken mevlâ-yı itâkası olan Ahmed Çelebi nâm kimesnenin câriyesi Ferahşad ve kullarından Cafer ve Murad nâm kimesneler zevcem mezbûreyi evimde yalnız bulup sabah vaktinde basıp aldırmak murâd edinip evimden bir mükelled sandık ile esbâb ve bir mikdâr nukūd alıp gitmişlerdir üzerine varıp görülmesin taleb ederim deyû mahkeme tarafından âdem taleb eyledikde Mevlânâ Hasan Halîfe ve Muhzır Mustafa irsâl olunup vardıklarında mesfûre Yasemin mârrü’z-zikr Ferahşad ve mezbûrân Cafer ve Murad sabah zamânında üzerime gelip evimde beni basıp ve elimi bağlayıp aldırmak istediler âhirü’l-emr bir mükelled sandık ile benim esbâbım ve zevcim mezbûrun esbâbın alıp gasb eylediler dedikde mezbûre câriye Ferahşad ve merkūm Cafer hâzır olup vâkı‘a mesfûre Yasemin hasta ve zebûn olmağın bir mükelled sandık ile esbâbın alıp efendimiz mezbûr Ahmed Çelebi’nin evine alıp gittik deyû ikrâr ve i‘tirâf eylediklerinde vâki‘ hâl gıbbe’t-taleb ketb olundu. Şuhûdü’l-hâl: Hızır b. Abdullah, Ali b. Hasan, Abbas b. Receb, Ahmed b. Hasan, Mehmed üstâd-ı bıçakçı ve gayr