Eyüb Mahkemesi (Havass-ı Refia) 3 Numaralı Sicil (H. 993 - 995 / M. 1585 - 1587) cilt: 22, sayfa: 188 Hüküm no: 294 Orijinal metin no: [32a-4, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma Hâtun bt. Emir’in evini Mehmed Bey Vakfı’na istiğlâl yoluyla sattığı Fâtıma Hâtun bt. Emir kıbelinden bey‘-i âti’z-zikre vekîl olup vekâleti Ahmed b. Abdullah ve Musa b. İsâ şehâdetleriyle sâbite olan Mehmed b. Ebûbekir meclis-i şer‘-i şerîfde ikrâr etti ki kendisine âid mülkü olan Otakçıbaşı mahallesinde vâki‘ bir beyt-i süflîyi ve ulvîyi ve cüneyneyi muhtevî Hüseyin Paşa vakfı ve Ferhad b. Abdullah mülkü ve tarafeynden tarîk-i hâs ile mahdûd olan cemî‘ menzilini mikdârı fıddî râyic fi’l-vakt iki bin akçe semen-i mu‘ayyen-i makbûza hâmil-i hâze’l-kitâb Mehmed Bey vakfı’na mütevellî olan Sefer Hâce b. Mehmed’e bey‘-i sahîh-i şer‘î ile bey‘ etmeğin ol dahi vakf-ı mezbûrun malı ile istiğlâlen iştirâ edip tahliyye ve tekābuzdan sonra işbu kitâbın zeylindeki târih şehri gurresinden sene-i kâmile tamâmına değin müddet-i mezbûrede mezbûrü’n-na‘t iki yüz elli akçe ücret-i mu‘ayyeneye istîcâr eyledikde mütevellî dahi ana îcâr etmeğin istîcâr ve îcâr-ı sahîhayn-i şer‘iyyeyn ve ikrâr-ı sarîh-i mer‘î mütevellî kıbelinden vicâhen ve şifâhen tasdîk olunup derkine ve ücretine vekîl-i mezbûr Mehmed b. Ebûbekir emr ve kabûlü hâviye kefâlet ile kefîl olmağın [kayd olundu]. Cerâ ( ) Şuhûdü’l-hâl: Hüsam Halîfe [b.] Abdurrahman, Mustafa b. Nasuh, Muslu Çelebi el-İmâm, Mustafa b. Ferhad el-Müezzin, Nurullah b. Musa, Bâli b. Hüseyin