Eyüb Mahkemesi (Havass-ı Refia) 3 Numaralı Sicil (H. 993 - 995 / M. 1585 - 1587) cilt: 22, sayfa: 190 Hüküm no: 297 Orijinal metin no: [32b-2, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Manol v. Yorgi’nin evini kardeşi Elanarda’ya sattığı Küçük Suyolcu deyû ma‘rûf karyede sâkin olan Manol v. Yorgi nâm zimmî meclis-i şer‘-i şerîfde ikrâr etti ki kendisine âid mülkü olan karye-i mezbûrede vâki‘ bir beyt-i süflîyi muhtevî Dimitri et-Terzi ve bâyi‘-i mezbûr ve müşteri’l-merkūmun mülkü ve tarîk-i âm ile mahdûd olan cemî‘ menzilini bi-cümleti’l-hudûd ve kâffeti’l-hukūk mikdârı fıddî râyic fi’l-vakt iki bin iki yüz akçe semen-i mu‘ayyen-i makbûza hâmil-i hâze’l-kitâb mezbûr zimmînin karındaşı olan Elanarda nâm zimmîye tarafeynden îcâb ve kabûl ile teslîm ve tesellümü müştemil bey‘ ve ibtiyâ‘-ı bâtteyn-i sahîhayn-i şer‘iyyeyn ile bey‘ ettikde ol dahi andan kendi malıyla ve nefsi için iştirâ etmeğin ikrâr-ı sarîh-i mer‘î müşteri’l-merkūm kıbelinden vicâhen ve şifâhen tasdîk olunmağın [kayd olundu]. Şuhûdü’l-hâl: Sefer Bey [b.] Abdullah, Hüseyin b. Hasan, Kerim [b.] Süleyman, Mehmed b. Mehmed, Evhad? [b.] İbrahim, Mahmud [b.] Arslan, Muslu Çelebi [b.] Şuca‘, Hüdâverdi [b.] Abdullah