Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 161 Hüküm no: 116 Orijinal metin no: [16a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Koçi v. Kiro’nun ölen Lamberi v. Kiro’daki alacağını vârislerinden talep ettiği Kürkçü tâifesinden bâ‘isü’s-sifr Koçi v. Kiro nâm zimmî meclis-i şer‘de tâife-i merkūmeden olup bundan akdem hâlik olan Lamberi v. Kiro nâm zimmînin anası ve terekesine vâzı‘ü’l-yed olan Fagona bt. Yorgi nâm nasrâniye muvâcehesinde üzerine da‘vâ ve takrîr-i kelâm edip hâlik-i merkūm zimmetinde yedimden müşterâ ve makbûz beynimizde ma‘lûm samur paçası kürk semeninden yüz esedî guruş hakkım olup hattâ hayâtında meblağ-ı mezbûr vech-i mübeyyen üzre zimmetinde bana deyni olduğunu bin yetmiş altı Şevvâli’nin dördüncü gününde mahmiye-i İstanbul’da Bâb mahkemesi’nde hilâfete müvellâ olan Mehmed Efendi b. Mustafa huzûrunda ikrâr ve mûcebince yedime hüccet-i şer‘iyye dahi vermeğin meblağ-ı mezbûrun kırk dört buçuk guruşunu hayâtında yedinden ahz u kabz edip bâkī elli beş buçuk esedî guruşu kable’l-edâ hâlik olup zimmetinde kalmağla suâl olunup tereke-i vâfiyesinden alıvermek matlûbumdur deyû târih-i mezbûr ile müverraha ve mûmâ-ileyhin imzâ ve hatmini hâviye hüccet-i şer‘iyye ibrâz edip mezbûre Fagona muvâcehesinde feth ve kırâat ve istintâk olundukda mezbûre Fagona bi’l-külliye inkâr edicek müdde‘î-i merkūmdan mazmûn-ı hüccet-i mezbûreye beyyine taleb olundukda zeyl-i hüccet-i merkūmede mastûrü’l-esâmî olan müslimînden Osman Çelebi b. Mustafa ve Ramazan b. Abdullah nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka merkūme Fagona’nın mûrisi hâlik-i mezkûr Lamberi müdde‘î-i merkūm Koçi’ye yedinden müşterâ ve makbûz beynlerinde ma‘lûm samur paçası kürk semeninden yüz esedî guruş deyni olduğunu târih-i mezkûrda Bâb mahkemesi’nde hilâfete müvellâ olan mûmâ-ileyh Mehmed Efendi huzûrunda ikrâr edip mûcebince mezbûrun yedine işbu hüccet-i şer‘iyyeyi vermişdir biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûle oldukdan sonra meblağ-ı bâkī-i mezbûru hâlik-i merkūmdan hayâtında küllen ve ba‘zen ahz ve istîfâ veya hibe veya âhara havâle ve turûk-ı şer‘iyyeden bir tarîk ile zimmetini ibrâ etmediğine müdde‘î-i merkūma yemîn teklîf olundukda ol dahi alâ vefki’l-mes’ûl yemîn billâhi’llezî enzele’l-İncîle alâ İsa aleyhi’s-selâm etmeğin mûcebince meblağ-ı bâkī-i mezbûreyi hâlik-i merkūmun terekesinden müdde‘î-i mezbûra edâ ve teslîme merkūme Fagona’ya tenbîh olunup mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn min şehri Rebî‘ilâhir li sene seb‘a ve seb‘în ve elf. Şuhûdü’l-hâl: Şükrullah Bey b. Mustafa, Mehmed Bey b. Ramazan, Baba Resul b. Rıdvan, Yusuf b. Hasan.