Eyüb Mahkemesi (Havass-ı Refia) 3 Numaralı Sicil (H. 993 - 995 / M. 1585 - 1587) cilt: 22, sayfa: 193 Hüküm no: 304 Orijinal metin no: [33a-4, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hümâ Hâtun bt. Mahmud’un evini Otakçıbaşı Vakfı’na istiğlâl yoluyla sattığı Medîne-i Ebâ Eyyûb el-Ensârî mahallâtından el-Hâc Hüsrev mahallesinde sâkin Hümâ Hâtun bt. Mahmud meclis-i şer‘-i şerîfde ikrâr etti ki kendisine âid mülkü olan mahalle-i mezbûrede vâki‘ Şem‘î Hâtun mülkü ve Aynî Hâtun mülkü ve tarafeynden tarîk-i âm ile mahdûd cemî‘ menzilini bi-cümleti’l-hudûd ve kâffeti’l-hukūk mikdârı fıddî râyic fi’l-vakt üç bin akçe semen-i mu‘ayyen-i makbûza hâmil-i hâze’l-kitâb merkūm Otakçıbaşı vakfı’na mütevellî olan Mustafa Halîfe b. Mehmed’e bey‘-i sahîh-i şer‘î ile bey‘ etmeğin ol dahi andan vakf-ı mezbûrun malı ile istiğlâl için iştirâ ettikde tahliyye ve tekābuzdan sonra dokuz yüz doksan üç senesi Zilka‘desi gurresinden sene-i kâmile tamâmına değin müddet-i mezbûrede mezbûrü’n-na‘t üç yüz akçe ücret-i mu‘ayyeneye istîcâr eyledikde mütevellî dahi ana îcâr etmeğin istîcâr ve îcâr -ı sahîhayn-i şer‘iyyeyn ve ikrâr-ı sarîh-i mer‘î mütevelli’l-merkūm kıbelinden vicâhen ve şifâhen tasdîk olunup derkine ve ücretine Mustafa b. İsâ ve Mustafa b. Muharrem ve mukırra-i mezbûrenin zevci Mehmed b. Abdullah emr ve kabûlü hâviye kefâlet ile kefîl olmağın [kayd olundu]. Şuhûdü’l-hâl: Muslihiddin Halîfe el-İmâm, es-Seyyid Abdi b. es-Seyyid Mustafa, Ramazan b. Mehmed, Bâli b. Hüseyin, Ahmed Çelebi b. Mehmed, Mustafa b. İvaz