Eyüb Mahkemesi (Havass-ı Refia) 3 Numaralı Sicil (H. 993 - 995 / M. 1585 - 1587) cilt: 22, sayfa: 193 Hüküm no: 303 Orijinal metin no: [33a-3, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Râziye Hâtun bt. Mehmed’in evinin Kamer Hâtun Vakfı’na istiğlâl yoluyla satıldığı Râziye Hâtun nâm kızı kıbelinden bey‘ ve istîcâr-ı âti’z-zikre vekîl-i şer‘î olan Mehmed b. Üveys vekâleti Sefer b. Abdullah ve Mehmed Bey b. Abdullah el-Bevvâbü’s-sultânî şehâdetleriyle sâbit oldukdan sonra ikrâr etti ki müvekkile-i mezbûre kendisine âid mülkü olan Ebâ Eyyûb el-Ensârî -aleyhi rıdvânü’l-meliki’l-Bârî- mahallâtından Çavuş Kasım mahallesinde vâki‘ bir beyt-i ulvîyi ve altında bir beyt-i süflîyi muhtevî Mehmed b. Abdullah mülkü ve Mihman Hâtun mülkü ve Emir-i Tunusî deyû bilinen [kimesnenin] mülkü ve Sefer b. Abdullah mülkü ile mahdûd cemî‘ menzilini bi-cümleti’l-hudûd ve kâffeti’l-hukûk mikdârı fıddî râyic fi’l-vakt iki bin akçe semen-i mu‘ayyen-i makbûza hâmil-i hâze’l-kitâb Kamer Hâtun vakfı’na mütevellî olan Abdülkādir b. Mehmed el-İmâm’a bey‘-i sahîh-i şer‘î ile bey‘ etmeğin ol dahi andan vakf-ı mezbûrun malı ile istiğlâl için satın almağın tahliyye ve tekâbuzdan sonra işbu kitâbın zeylindeki târihin şehri Muharremi’l-harâmı gurresinden sene-i kâmile tamâmına değin müddet-i mezbûrede mezbûrü’n-na‘t iki yüz akçe ücret-i mu‘ayyeneye istîcâr eyledikde mütevellî dahi ana îcâr etmeğin îcâr ve istîcâr-ı sahîhayn-i şer‘iyyeyn ve ikrâr-ı sarîh-i mer‘î mezbûr tarafından vicâhen ve şifâhen tasdîk olunup derkine ve ücretine müvekkile-i mezbûrenin zevci Mehmed Bey b. Abdullah ile mezbûr Mehmed Bey emr ve kabûlü hâviye kefâlet ile kefîl olmağın [kayd olundu]. Şuhûdü’l-hâl: Mustafa [b.] İskender, Mustafa b. Memişah?, Hüdâverdi b. Abdullah, Musa b. Ferhad, Kasım b. Abdullah, Yusuf b. Memişah, Sefer b. Abdullah