Eyüb Mahkemesi (Havass-ı Refia) 3 Numaralı Sicil (H. 993 - 995 / M. 1585 - 1587) cilt: 22, sayfa: 195 Hüküm no: 307 Orijinal metin no: [33b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Yorgi v. Manol’ün memleha iltizâmından mîrîye olan borcunu ödemek için vârislerinin Mahmud Çavuş b. Murad’dan ödünç aldıkları Medîne-i Ebâ Eyyûb el-Ensârî -aleyhi rıdvânü’l-meliki’l-Bârî-’de sâkin olan Dergâ[h-ı] sa‘âdet-penâh çavuşlarından umdetü’l-emâcid ve’l-ekârim Mahmud Çavuş b. Murad mahfil-i kazâda mahmiye-i Kostantıniyye mahallâtından Balat mahallesi sâkinlerinden sâbıkan mürd olan Yorgi v. Manol nâm zimmînin zevcesi Erine bt. Manol ve bülûğa lâyık sinde olup bülûğuna mu‘terife olan sulbiye kızı Esalene ve mürd-i mezkûrun kız karındaşı Ezmerağda kıbelinden husûs-ı âti’z-zikre nehc-i şer‘î üzre vekâleti sâbite olan karındaşı Kostantin v. Manol ve diğer kız karındaşı Erine kıbelinden tasdîk-i âti’z-zikre bimâ hüve tarîkü’s-sübût şer‘an vekâleti sâbite olan mezbûre Erine’nin zevci Yani v. Matyos mahzarlarında ikrâr-ı sahîh-i şer‘î ve i‘tirâf-ı sarîh-i mer‘î edip mürd-i mezbûrun Enez ve Kavak memlehaları iltizâmından mîrîye bir mikdâr akçe deyni olmağın zikr olunan vârisleri deynini edâ etmek için benden kırk beş bin râyic fi’l-vakt akçe karz aldılar zikr olunan kırk beş bin akçeden gayrı mürd-i mezbûr ile mezkûrların zimmetlerinde vechen mine’l-vücûh bir akçe ve bir habbe hakkım yokdur dedikde mukırr-ı merkūmu akvâl-i meşrûhasında vicâhen ve şifâhen tasdîk eylediklerinde mâ vaka‘a vukū‘u üzre gıbbe’t-taleb kayd olundu. Şuhûdü’l-hâl: Mustafa b. Yusuf, Bâli b. Hüseyin, Ali b. Abdullah, el-Hâc Kenan b. Mustafa, Mehmed b. Ali, Ahmed Halîfe el-İmâm, Sinan Halîfe el-Hatîb, Mustafa [b.] Receb