Eyüb Mahkemesi (Havass-ı Refia) 3 Numaralı Sicil (H. 993 - 995 / M. 1585 - 1587) cilt: 22, sayfa: 195 Hüküm no: 308 Orijinal metin no: [33b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Yorgi v. Manol’ün memleha iltizâmından mîrîye olan borcunu ödemek için vârislerinin Mahmud Çavuş b. Murad’dan ödünç aldıkları ve evlerini rehin olarak verdikleri Budur ki mahmiye-i Kostantıniyye mahallâtından Balat mahallesi sâkinlerinden sâbıkan mürd olan Yorgi v. Manol nâm zimmînin bülûğa lâyık sinde olup bülûğuna mu‘terife olan sulbiye kızı asâleten ve zevcesi Erine bt. Manol ve mürd-i merkūmun kız karındaşı Ezmerağda kıbelinden husûs-ı âti’z-zikri ikrâra nehc-i şer‘î üzre vekâleti sâbite olan karındaşı Kostantin v. Manol ve diğer kız karındaşı Erine kıbelinden ikrâr-ı âti’z-zikre bimâ hüve tarîkü’s-sübût şer‘an vekâleti sâbite olan mezbûre Erine’nin zevci Yani v. Matyos medîne-i Ebâ Eyyûb el-Ensârî -aleyhi rıdvânü’l-meliki’l-Bârî-’de sâkin olan Dergâh-ı âlî çavuşlarından umdetü’l-emâcid ve’l-ekârim Mahmud Çavuş b. Murad mahzarında mahfil-i kazâ ve mahall-i irtizâda asâleten ve vekâleten ikrâr-ı sahîh-i şer‘î ve i‘tirâf-ı sarîh-i mer‘î edip mürd-i mezbûrun vilâyet-i Rumeli’nde vâki‘ Enez ve Kavak memlehaları iltizâmından mîrîye bir mikdâr akçe deyni olmağın hâlâ mîrîye olan deynini edâ etmek için müşârün-ileyh Mahmud Çavuş’dan kırk beş bin râyic fi’l-vakt akçe ki te’kîden li’l-asl ve tavzîhan li’l-kül nısfı yirmi iki bin beş yüz akçe olur karz-ı hasen alıp kabz eyledik ve zikr olunan kırk beş bin akçe mukābelesinde mahalle-i merkūmede vâki‘ olup inde’l-cîrân ma‘lûmetü’l-hudûd mülk-i mevrûsumuz olan menzili müşârün-ileyh Mahmud Çavuş’a rehin tarîk[i] ile verdik dediklerinde mezbûrları akvâl-i meşrûhalarında mûmâ-ileyh Mahmud Çavuş vicâhen ve şifâhen tasdîk ve tahkīk eyledikde kayd-ı sicil olundu. Fî evâhiri Muharrem sene 994. Şuhûdü’l-hâl: Mustafa b. Yusuf, Bâli b. Hüseyin, Hüseyin b. Mehmed, Ali b. Abdullah, el-Hâc Kenan b. Mustafa, Mehmed b. Ali, Ahmed Halîfe el-İmâm