Eyüb Mahkemesi (Havass-ı Refia) 3 Numaralı Sicil (H. 993 - 995 / M. 1585 - 1587) cilt: 22, sayfa: 202 Hüküm no: 314 Orijinal metin no: [35a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Cebecibaşı Ahmed Ağa vakfı tasarrufundaki Sultan Bayezid Evkâfı arâzisinden bir buçuk evlek yerin Mehmed’e altmış yıllığına kiralandığı Bâlâda zikr olunan arz-ı hâliyeden mütevellî Mustafa Bey nâm kimesne mahfil-i kazâda ikrâr edip arz-ı mezbûreden her evleği tûlen otuz zirâ‘ ve arzan yirmi beş zirâ‘ olmak üzre hudûdunun bir cânibi Mehmed Çelebi b. Aydın yeri ve bir cânibi mekābir-i Yahud ve iki cânibi arz-ı hâliye ve tarîk-i âm ile mahdûd bir buçuk evlek yeri içinde bir su kuyusuyla târih-i kitâbdan altmış yıla icâre-i tavîle ile sâhibü’s-sicil Mehmed b. …..?’ye dört bin elli akçe mukāta‘aya verip hâlâ yedinden üç bin altı yüz akçesin alıp bâkī dört yüz elli akçeyi sâl-be-sâl yedi buçuk akçe vermek üzre kabûl edip gıbbe’t-tasdîk kayd şüd. Şuhûdü’l-hâl: Hüseyin b. Abdullah, İbrahim b. Abdullah, Hemdem b. Abdullah, Mehmed b. Hayreddin, Reis Mehmed b. Abdullah, Murad b. Yusuf, Sinan b. Abdullah, Ramazan b. Şaban, Mehmed b. Mahmud, Ahmed b. Abdullah, el-Hâc Mustafa tekyenişîn