Eyüb Mahkemesi (Havass-ı Refia) 3 Numaralı Sicil (H. 993 - 995 / M. 1585 - 1587) cilt: 22, sayfa: 201 Hüküm no: 313 Orijinal metin no: [35a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Cebecibaşı Ahmed Ağa vakfı tasarrufundaki Sultan Bayezid Evkâfı arâzisinden dört evlek yerin Seyyid Hasan Çelebi Evkâfı’na altmış yıllığına kiralandığı Budur ki bâlâda zikr olan evkāf mütevellîsi Mustafa Bey b. Ahmed ikrâr edip bâlâda mastûr olan arâzi-i hâliyeden bir cânibi Müderriszâde Mehmed Çelebi Efendi yerleri ve bir cânibi kâfirler makberesi ve iki cânibi tarîk-i âm ile mahdûd olup tûlen yüz yirmi zirâ‘ ve arzan yüz zirâ‘ dört evlek yeri târih-i kitâb şehrinin gurresinden altmış yıl tamâmına varınca icâre-i tavîleyi tecvîz eden fukahâ-i üli’l-elbâb kavilleri üzre tecdîd-i müte‘âkideyne muhtâc olmaksızın her üç yılda bir akd-i cedîd olup akd-i evvelin intihâsı akd-i sânînin ibtidâsı olmak üzre mecâlis-i müte‘addidede mütevâliyeten yirmi kere akd ile sâhibü’s-sicil Dergâh-ı âlî müteferrikalarından es-Seyyid Hasan Çelebi b. es-Seyyid Cemaleddin nâm kimesnenin evkāfına mütevellî olan fahrü’l-a‘yân Rüstem b. Abdülmennân nâm kimesneye mezbûr Hasan Çelebi’nin vakfı için dokuz bin iki yüz akçe mukāta‘aya verip mütevellî-i mezbûr Rüstem dahi kabûl eyleyip sekiz bin nakid akçesini mezbûr Hasan Çelebi’nin vakıf akçelerinden mu‘accelen alıp bin iki yüz akçesin sâl-be-sâl yirmişer akçe vermeye şart eyleyip ba‘de’l-yevm her sene âhirinde lâzım olan yirmi akçe mukāta‘asın müşârün-ileyh Cebecibaşının mütevellîsine verip edâ ede zikr olan yeri ba‘de yevminâ hâzâ keyfe mâ yeşâ ve yahtâr mutasarrıf ola dedikde mukırr-ı mezkûrun vech-i meşrûh üzre olan ikrârın mukarrun lehü’l-mezbûr Rüstem Ağa tasdîk edip kayd-ı sicil olundu. Fî evâsıtı Ramazân li sene 994. Şuhûdü’l-hâl: Es-Sâbikūn