Eyüb Mahkemesi (Havass-ı Refia) 3 Numaralı Sicil (H. 993 - 995 / M. 1585 - 1587) cilt: 22, sayfa: 209 Hüküm no: 330 Orijinal metin no: [37b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Eyüp kadısının talebiyle Sultan Bayezid Hân Evkâfı’na ait boş arâzinin ev yapılmak üzere halka dağıtılarak yerleşim yeri hâline getirilmesine dâir buyruldu Kıdvetü’l-kuzât ve’l-hükkâm ma‘denü’l-fazli ve’l-kelâm Mevlânâ Hâslar kadısı -zîde fazluhû- ve kıdvetü’l-emâcid ve’l-ekârim câmi‘ü’l-mehâmid ve’l-mekârim el-muhtas bi-mezîdi inâyeti’l-meliki’l-allâm merhûm ve mağfûrun-leh Sultan Bayezid Hân imâreti mütevellîsi -dâme mecduhû- tevkī‘-i refî‘-i hümâyûn vâsıl olıcak ma‘lûm ola ki sen ki Hâslar kadısısın Dergâh-ı mu‘allâma mektûb gönderip mahrûse-i İstanbul hisarı’ndan Eğrikapı hâricinde Ebâ Eyyûb Ensârî -aleyhi’r-rahmetü’l-Bârî- mahallâtından müteveffâ Abdi Çelebi mahallesi halkı cemî‘an meclis-i şer‘a gelip mahallemiz hâlî yerde vâki‘ olmağla dâimâ havfdan hâlî olmayıp civârlarında merhûm ve mağfûrun-leh ceddim Sultan Bayezid Hân -tâbe serâhu- evkāfı’ndan mukāta‘aya verilir bir mikdâr arz-ı hâliye olup fukarâya evlek evlek tevzî‘ olunsa vakfa mukāta‘asæ edā olunmak üzre evler yapılıp cümle otuz hâne olduğundan gayrı cemâ‘at-i kesîreye dahi bâ‘is olur deyû arz eylediğin ecilden zikr olunan arz-ı hâliye mukāta‘alarıyla tâlib olanlara evlek evlek tevzî‘ olunmasın emr edip buyurdum ki hükm-i şerîfim vardıkda emrim mûcebince zikr olunan hâlî vakıf yerleri anın gibi tâlib olanlara mukāta‘a ile evlek evlek tevzî‘ edip içinde oturup sâkin olmak için evler binâ ettirip ihyâ eyleyesin ammâ bir vechile tevzî‘ eyleyesin ki vakfın mukāta‘a-i mu‘ayyenesine zarar müretteb olmak ihtimâli olmaya şöyle bilesin alâmet-i şerîfe i‘timâd kılasın. Tahrîren fî evâili Cumâdelûlâ sene erba‘a ve tis‘în ve tis‘a mi’e. Be-makām-ı Kostantıniyye