Eyüb Mahkemesi (Havass-ı Refia) 3 Numaralı Sicil (H. 993 - 995 / M. 1585 - 1587) cilt: 22, sayfa: 210 Hüküm no: 331 Orijinal metin no: [37b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin Çelebi’nin tasarrufundaki Sultan Bayezid Hân Evkâfı’na ait mezraa ve yel değirmeninin tasarruf hakkını Cebecibaşı Ahmed Ağa b. Abdülmennân’a devrettiği Budur ki merhûm ve mağfûrun-leh Sultan Bayezid Hân -aleyhi’r-rahmetü ve’r-rıdvân- hazretlerinin mahmiye-i İstanbul’da binâ olunan câmi‘-i şerîf ve imâret-i âmireleri evkāfından mahrûse-i mezbûre bağları cibâyetine tâbi‘ Eğrikapı hâricinde Kemer Çardağı kurbunda vâki‘ tahmînen yirmi altı dönüm üç nişân mezra‘a ki bir tarafı mekābir-i Yahudi ve üç tarafı tarîk-i âma mahdûd ve müntehî olup her sene yüz sekiz akçe mukāta‘a ile ve ber vech-i maktû‘ her sene kırk akçe mukāta‘a ile bir bâb yel değirmenine mutasarrıf olan Hüseyin Çelebi nâm kimesne hakk-ı tasarruflarını ve hakk-ı karârlarını işbu hâfızü’l-kitâb mefharü’l-emâsil ve’l-akrân umdetü’l-ekâbir ve’l-a‘yân Dergâh-ı âlî cebecileri başısı Ahmed Ağa b. Abdülmennân’a tefvîz ve teslîm eyleyip mukābele-i tefvîzde altmış beş bin akçe verip ve kānûn-ı kadîm üzre resmi cânib-i vakf-ı şerîfe edâ olunup tasarruflarına bu cânibden izin ve temessük taleb eylediklerin cibâyet-i mezbûre kâtibi Mustafa ve câbileri Hüsrev ve Mahmud i‘lâm eylemeğin ber mûceb-i şer‘-i kavîm ve nehc-i müstakīm verilip uhdelerinde mukarrer kılındı mâdem ki zikr olunan mezra‘anın ve âsiyâb-ı bâdın mukāta‘a-i mu‘ayyenesini sâl-be-sâl vakf-ı mezbûr zâbitlerine bî-kusûr edâ eyleyeler taht-ı tasarruflarında olup vechen mine’l-vücûh hâricden kimesne mâni‘ ve mu‘ârız ve müzâhim olmaya ve bu vesîka ketb olunup alâ sebîli’t-temessük yed-i tâlibe vaz‘ ve def‘ olundu ki sıdk-ı makāli müsaddak olup lede’l-ihtiyâc ihticâc oluna. Cerâ zâlike ve hurrire fî evâili şehri Cumâdelâhire min şuhûri sene erba‘a ve tis‘în ve tis‘a mi’e. el-Fakīrü’l-hakīr Musa? el-Mütevellî