Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 162 Hüküm no: 119 Orijinal metin no: [16a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Apostol v. Papa Dimo’nun, mum imali için selhhaneden iç yağı alma taahhüdü Mumcu tâifesinden Papadya demekle ma‘rûf Apostol v. Papa Dimo nâm zimmî meclis-i şer‘-i şerîf-i lâzımü’t-teşrîfde işbu ashâbü’l-kitâb umdetü’l-muhadderât Rukiye Hanım bt. el-merhûm Ahmed Paşa’nın mahmiye-i İstanbul hısnı ebvâbından Kumkapı hâricinde vâki‘ mumhânesinde mumcu olan Yani v. Rizo ve Rizo v. Baros nâm zimmîler muvâcehelerinde ikrâr ve takrîr-i kelâm edip zikr olunan kapı hâricinde vâki‘ Mahmud Ağa selhhânesinde her otuz günde zebh olunan koyunların bügrek ve iç yağlarından on beş günde müctemi‘ olan yağı müvekkile-i müşârün-ileyhânın zikr olunan mumhânesinde mumcu olanlar ve on beş günde dahi müctemi‘ olan yağı sâir mumcular alagelmişken birkaç gün ben ziyâde almışdım hâlâ yine kasr-ı yed eyledim zikr olunan selhhânede her otuz günde zebh olunan koyunun yağlarından on beş günde müctemi‘ olan yağı ke’l-evvel mûmâ-ileyhânın mumhânesinde mumcu olanlar alsın benim alâkam yokdur dedikde, gıbbe’t-tasdîk mâ vaka‘a bi’t-taleb ketb olundu. Fi’l-yevmi’l-âşir min şehri Rebî‘ilâhir li sene seb‘a ve seb‘în ve elf. Şuhûdü’l-hâl: Mehmed Çelebi b. Abdullah Kethüdâ-yı Muhzırân, İbrahim Çelebi b. Ahmed, Şükrullah Bey b. Mustafa, Veli b. Mahmud, Hasan Çelebi b. Ahmed, Abdi Çelebi b. Hüseyin.