Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 163 Hüküm no: 120 Orijinal metin no: [16a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mülâyim bt. Abdullah’ın evini kendisine ölene kadar bakmak şartıyla Abdullah Çelebi b. Mustafa’ya hibe ettiği Mahmiye-i İstanbul’da Seferikoz mahallesi sâkinelerinden Mülâyim bt. Abdullah nâm hâtun zâtını ma‘rifet-i şer‘iyye ile ârifân olan İmâm Mehmed Efendi b. Mustafa ve müezzin Ahmed Efendi b. Mehmed nâm kimesneler ta‘rîfleriyle mu‘arrefe oldukdan sonra meclis-i şer‘-i şerîf-i şâmihü’l-imâd ve mahfil-i dîn-i münîf-i râsihü’l-evtâdda velîsi kızı oğlu işbu bâ‘isü’l-kitâb Abdullah Çelebi b. Mustafa nâm kimesne mahzarında bi’t-tav‘i’s-sâf ikrâr ve i‘tirâf edip hibe-i âtiyyetü’z-zikrin sudûruna değin yedimde mülküm ve hakkım olup mahalle-i mezbûrede vâki‘ bir tarafdan Hatice Hâtun bt. Mustafa mülkü ve bir tarafdan Medîne-i Münevvere vakfı ve bir tarafdan Ahmed Efendi b. Mehmed mülkü ve bir tarafdan tarîk-i âm ile mahdûd fevkānî bir bâb oda ve dehlizi ve kenîfi ve havluyu müştemil menzili târih-i kitâbdan bir sene mukaddem mezbûr Abdullah Çelebi’ye ölünce[ye] beni görüp gözetip beslemek üzre hibe ve ba‘de’t-tahliyyeti’ş-şer‘iyye teslîm edip ol dahi ittihâb ve tesellüm etmiş idi dedikde, gıbbe’t-tasdîk mâ vaka‘a bi’t-taleb [ketb] olundu. Fi’l-yevmi’l-âşir min Cumâdelûlâ li sene seb‘a ve seb‘în ve elf. [16b] Şuhûdü’l-hâl: El-Hâc Abdülkādir b. Abdülvehhâb, Ahmed Halîfe b. Mehmed, Murad Beşe b. Mustafa, Musli Çelebi b. Emrullah, es-Seyyid Hüseyin Çelebi b. es-Seyyid Mahmud Çelebi.