Eyüb Mahkemesi (Havass-ı Refia) 3 Numaralı Sicil (H. 993 - 995 / M. 1585 - 1587) cilt: 22, sayfa: 212 Hüküm no: 337 Orijinal metin no: [38a-6] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Reis b. Abdullah’ın tasarrufundaki Sultan Bayezid Hân Evkâfı’na ait arâzinin tasarruf hakkını Seyyid Abdülkâdir b. Seyyid Mehmed Efendi’yi devrettiği Budur ki Mehmed Reis b. Abdullah mahfil-i kazâda ikrâr ve i‘tirâf kılıp mahrûse-i Kostantıniyye ebvâbından Eğrikapı hâricinde sâhibü’l-izzeti’ş-şâmiha ve’d-devleti’r-râsiha bi’l-fi‘l Cebecibaşı olan Ahmed Ağa mahallesinde Sultan Bayezid Hân -aleyhi’r-rahmetü ve’r-rıdvân- evkāfı’na müte‘allik müslümanlara evlek evlek tevzî‘ olunup taht-ı tasarrufumda olan arz-ı hâliyenin ki bir cânibi mahall-i mezbûrdan cereyân eden su harkı ile ve bir cânibi defterdârlıkdan mütekā‘id Seyfullah Efendi yeri ve cânibeyni tarîk-i âm ile mahdûddur zikr olan yerin tasarrufundan ferâgat edip sâhib-i arz ma‘rifeti ile işbu sâhib-i kitâb-ı şer‘î kıdvetü’l-ulemâ’i’l-muhakkikīn umdetü’l-fuzalâ’i’l-müdakkikīn şerîfü’n-neseb nazîfü’l-haseb es-Seyyid Abdülkādir b. el-merhûm el-mağfû[ru] leh es-Seyyid Mehmed Efendi’ye tefvîz ettim ve mukābelesinde iki bin nakd-i râyic fi’l-vakt fıddî akçesin aldım dedikde mukırr-ı mezbûrûn ikrâr-ı meşrûhun mukarrun lehü’l-mûmâ-ileyh Abdülkādir Efendi cânibinden tasdîke vekîl olan Mevlânâ Ahmed Çelebi b. İbrahim tasdîk ve tahkīk etmeğin işbu vesîka-i enîka alâ mâ hüve’l-hakīka ketb olunup yed-i tâlibe vaz‘ ve def‘ olundu ki lede’l-ihtiyâc ibrâz edip ihticâc ede. Tahrîren fî evâsıtı şehri Zilka‘de sene 994. Şuhûdü’l-hâl: Mehmed b. Abdullah er-Reis, Mustafa Bey b. Ahmed el-mütevellî, el-Hâc Kenan b. Mustafa, Bâli b. Hüseyin, Mustafa b. Muharrem, muharrirü’l-hurûf Mehmed el-hakīr ve gayruhüm mine’l-hâzırîn