Eyüb Mahkemesi (Havass-ı Refia) 3 Numaralı Sicil (H. 993 - 995 / M. 1585 - 1587) cilt: 22, sayfa: 213 Hüküm no: 338 Orijinal metin no: [38b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hâslar za‘îmi Davud Bey’in iltizâmına dâhil olan Silivri mukâtaası ile ona bağlı Yaloz ve Kumburgaz köylerinin Yakut adlı Yahudiye bir yıllığına iltizâma verildiği (………..) Budur ki Hâslar za‘îmi fahrü’l-a‘yân Davud [Bey] (...) ve vekîli olan kâtib Mehmed Çelebi meclis-i şer‘-i şerîfde işbu hâmil-i hâze’l-kitâb [Yakut nâm] Yahudi mahzarında bast-ı kelâm edip eyitdi ki müvekkilim mûmâ-ileyhin iltizâmına dâhil Hâslar tevâbi‘inden nefs-i Silivri mukāta‘asın tevâbi‘iyle ve hâlâ mukāta‘a-i merkūmeye ilhâk olunan Yaloz ve Kumburgaz nâm karyeleri ile sene erba‘a ve tis‘în ve tis‘a mi’e Ramazân-ı şerîfinin yirmi yedinci gününden sene tamâmına varınca mukāta‘a-i merkūmeyi müvekkilim mezbûr Davud Bey elli iki bin akçeye mezbûr Yakut’a kat‘ edip verdi şol şartla ki sene-i mezbûre tamâmında mezbûr Yahudi muhâsebesin verip bi’t-tamâm meblağ-ı merkūmu bî-kusûr haklaşa dedikde mezbûr Yahudi dahi vech-i meşrûh üzre vekîl-i merkūmun kelimâtın tasdîk edip mukāta‘a-i merkūmeyi vech-i merkūm üzre zikr olunan tevâbi‘iyle elli iki bin akçeye kabûl edip ve nefs-i Silivri hisarı’nda cevânib-i erba‘ası tarîk-i âm ile mahdûd olan çardağı ve altında ahırı ve kileri müştemil menzilini mûmâ-ileyh Davud Bey’e rehnedip ve derkine nefs-i Silivri’ye vardıkda kefîl vermek üzre müte‘ahhid oldukdan sonra vâki‘ hâl tarafeynin talebleriyle tahrîr olunup yed-i tâlibe def‘ olundu ki vakt-i hâcetde müzekkir-i mâ cerâ ola. Tahrîren fi’l-yevmi’l-hâmis min şehri Zilhicce sene 994. Şuhûdü’l-hâl: Sefer b. Receb, Derviş Çelebi el-Bevvâbü’s-sultânî, Hacı Mehmed b. Abdullah, Bâli b. Hüseyin, Mustafa b. İvaz, Hacı Kenan b. Mustafa, Mustafa b. Yusuf ve gayr