Eyüb Mahkemesi (Havass-ı Refia) 3 Numaralı Sicil (H. 993 - 995 / M. 1585 - 1587) cilt: 22, sayfa: 214 Hüküm no: 339 Orijinal metin no: [38b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Cebecibaşı Ahmed Ağa vakfı tasarrufunda olan Sultan Bayezid Hân Evkâfı’na ait arâziden bir evlek yerin Ahmed Halîfe b. Mehmed’e altmış yıllığına kiralandığı Budur ki kıdvetü erbâbi’l-ikbâl umdetü ashâbi’l-iclâl mecma‘u’l-me’âsir ve’l-mekârim hâlâ cebeciler ağası [Ahmed Ağa] b. Abdülmennân nâm kimesnenin evkāfına mütevellî olan Mustafa b. Ahmed nâm kimesne meclis-i şer‘-i şerîfde bu hakīr yanında bast-ı kelâm edip mahrûse-i Kostantıniyye ebvâbından Eğrikapı hâricinde cennet-mekân firdevs-âşiyân merhûm [ve] mağfûrun-leh Sultan Bayezid Hân -aleyhi’r-rahmetü ve’r-rıdvân- hazretlerinin evkāfına müte‘allik arâziden yılda yüz kırk sekiz akçe mukāta‘a-i mu‘ayyenesi olan sâha-i mübeyyene üzre olan ebniye ve arsa-i hâliyesinin hakk-ı karârı mûmâ-ileyh cebecibaşı yedinde ve tasarrufunda olup müslümanlara evlek evlek tevzî‘ olunması murâd olundukda zikr olunan arz-ı hâliyeden her evleği tûlen otuz zirâ‘ ve arzan yirmi beş zirâ‘ olmak üzre hudûdunun bir cânibi Piyâle b. Abdullah ve bir cânibi sâbıkan defterdâr olan Seyfullah Efendi ve bir cânibi el-Hâc Abdi yerleri ve bir cânibi tarîk-i âma muttasıl olan bir evlek arz-ı hâliyeyi târih-i kitâb şehrinin gurresinden altmış yıl tamâmına varınca icâre-i tavîleyi tecvîz eden fukahâ-i üli’l-elbâb kavilleri [üzre] tecdîd-i müte‘âkideyne muhtâc olmaksızın her üç yılda bir akd ile işbu sâhibü’l-kitâb Ahmed Halîfe b. Mehmed nâm kimesneye iki bin üç yüz akçe mukāta‘aya verip yedinden iki bin fıddî akçesin mu‘accelen alıp bâkī üç yüz akçeyi sâl-be-sâl beşer akçe vermek şart eyleyip ba‘de’l-yevm her sene âhirinde lâzım olan beş akçe mukāta‘ayı müşârün-ileyh cebecibaşının mütevellîsine verip edâ ede dedikde mukırr-ı mezkûrun akvâl-i meşrûhasın mukarrun lehü’l-mezbûr vicâhen ve şifâhen tasdîk ve tahkīk eyledikden sonra bu vesîka li ecli’t-temessük ketb olunup yed-i tâlibe def‘ olundu ki vakt-i hâcetde müzekkir-i mâ cerâ [ola]. Fî 7 Zilhicce sene 994. Şuhûdü’l-hâl: Sinan b. Abdullah, es-Seyyid Mehmed Meremmetçi, Mehmed b. Abdullah, Mahmud b. Abdullah, Mustafa b. Abdullah, Mehmed Çelebi b. el-Hâc Hüsrev, Hasan b. Timur, Mahmud b. Ahmed, Muslihiddin ..? el-İmâm ve gayr