Eyüb Mahkemesi (Havass-ı Refia) 3 Numaralı Sicil (H. 993 - 995 / M. 1585 - 1587) cilt: 22, sayfa: 215 Hüküm no: 341 Orijinal metin no: [39a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Cebecibaşı Ahmed Ağa vakfı tasarrufunda olan Sultan Bayezid Hân Evkâfı’na ait arâziden üç evlek yerin Piyâle b. Abdullah’a altmış yıllığına kiralandığı Yevmü’s-sebt Sâdis-i şehr-i Rebî‘ulevvel sene 995. Kıdvet-i erbâbi’l-ikbâl bi’l-fi‘l cebecibaşı olan Ahmed Ağa b. Abdülmennân evkāfı’na mütevellî olan Mustafa b. Ahmed meclis-i şer‘-i şerîfde takrîr-i kelâm edip mahrûse-i Kostantıniyye ebvâbından Eğrikapı hâricinde huld-âşiyân Sultan Bayezid Hân evkāfı’na müte‘allik arâziden yılda yüz kırk sekiz akçe mukāta‘a-i mu‘ayyenesi olan sâha-i mübeyyene üzre olan ebniyenin ve arsa-i hâliyesinin hakk-ı karârı mûmâ-ileyh Cebecibaşı tasarrufunda olup müslümanlara evlek evlek tevzî‘ olunması murâd olundukda zikr olan arz-ı hâliyeden her evleği tûlen doksan zirâ‘ ve arzan otuz yedi buçuk zirâ‘ olmak üzre hudûdunun bir cânibi Sultan Selim Hân evkāfı’nın kâtib-i sânîsi Mehmed Çelebi’ye ve bir cânibi Hacı Kasım b. ( ) ve bir cânibi müezzin Mehmed Çelebi b. ( ) ve bir cânibi tarîk-i âma müntehî olan tûlen altmış zirâ‘ ve arzan yirmi beş zirâ‘ üç evlek arz-ı hâliyeyi târih-i kitâb şehrinin gurresinden altmış yıl tamâmına varınca icâre-i tavîleyi tecvîz eden fukahâ-i üli’l-elbâb kavilleri üzre tecdîd-i müte‘âkideyne muhtâc olmaksızın her üç yılda bir akd ile işbu sâhibü’l-kitâb Piyâle b. Abdullah nâm kimesneye dört bin altı yüz akçeye icâre-i tavîle ile verip dört bin akçesin mu‘accelen nakid alıp bâkī kalan altı yüz akçeyi sâl-be-sâl onar akçe vermek şartıyla altmış yıla değin icâre ile verdim ki ba‘de’l-yevm her sene vakf-ı mezbûr mütevellîsine edâ ede dedikde mukırr-ı mezbûr Mustafa mütevellînin ikrâr-ı meşrûhunu mukarrun lehü’l-merkūm Piyâle tasdîk edip mâ hüve’l-vâki‘ kayd olundu. Şuhûdü’l-hâl: Muslihiddin Halîfe el-İmâm, Sinan b. Abdullah, Seyyid Mehmed el-Müremmim, Mehmed b. Abdullah, Mahmud b. Abdullah, Mustafa b. Abdullah, Mehmed b. el-Hâc Hüsrev, Hasan b. Timur, Mahmud b. Ahmed ve gayruhüm