Eyüb Mahkemesi (Havass-ı Refia) 3 Numaralı Sicil (H. 993 - 995 / M. 1585 - 1587) cilt: 22, sayfa: 218 Hüküm no: 346 Orijinal metin no: [39b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kostantin ve Mihal’in ölen babaları Yanaki’den intikal eden ve vasîleri tarafından Ahmed Bey b. Abdülmennân’a satılan ev hakkındaki davaları için bedeli mukabilinde sulh yaptıkları Havâss-ı Kostantıniyye müzâfâtından Hasköy’de sâkin Kostantin ve Mihal veledey Yanaki nâm zimmî karındaşlar meclis-i şer‘-i şerîf-i enverde mezbûr Hasköy kurbunda? (...) Bahçesi nâm hâssa bahçede usta olan fahrü’l-akrân Ahmed Bey b. Abdülmennân tarafından tasdîk-i âtîye Mevlânâ Hayreddin Efendi b. Mustafa ve Mevlânâ Mirza b. Mehmed şehâdetleriyle vekâleti? (...) fahrü’l-mülâzımîn Mevlânâ Mirza b. Mehmed muvâcehesinde takrîr-i kelâm edip bundan akdem babamız mesfûr Yanaki mürd oldukda muhallefâtından karye-i mezbûrede mezbûr İskender Bahçesi kurbunda? (...) Okmeydanı ve bir tarafı İrini bt. Yani mülkü ve iki tarafı tarîk-i âm ile mahdûd olup iki süflî evi ve cüneyneyi ve bi’r-i mâyı ve muhavvata-i menzilini vasiyyem olan Perpeye bt. Sevadinos zarûret-i deyn için deyû mûmâ-ileyh Ahmed Bey’e dört bin akçeye bey‘ eyledikde ikimiz dahi sagīrler olup bize gadr [etti deyû?] taleb eyleyip aramızda münâza‘ât-ı adîde ve muhâsamât-ı şedîde olmuş idi el-hâletü hâzihî mâbeynimize muslihûn tavassut eylemeğin iki bin akçe[ye sulh edip] bedel-i sulh olan meblağ-ı merkūm iki bin akçeyi mesfûr Ahmed Bey’den bi’t-tamâm ikimiz kabz ve tesellüm eyleyip menzil-i mezkûru da‘vâ ve talebden (...) Ahmed Bey’in zimmetini ibrâ-i âm ile ibrâ ve iskāt-ı tâm ile iskāt eyleyip biz dahi berî olduk min ba‘d menzil-i mahdûd-ı merkūmda [da‘vâ] ve nizâ‘ımız yokdur eğer bi’z-zât veyâhud bi’l-vâsıta da‘vâ ve taleb ve nizâ‘ eder isek ve ettirir isek lede’l-hükkâmi’l-kirâm istimâ‘ olunmayıp zûr ve iftirâ ola deyû bi’t-tav‘i’s-sâf ikrâr ve i‘tirâf eylediklerinde mukırrân-ı mesfûrân Kostantin ve Mihal’in vech-i meşrûh ü[zre olan] ikrârların vekîl-i mezkûr Mevlânâ Mirza bi’l-vekâle vicâhen tasdîk eyledikden sonra vâki‘ olan ikrâr ve tasdîk inde’ş-şer‘i’l-enîk [mu‘teber] görülüp ( ) vukū‘u üzre gıbbe’t-taleb [kayd olundu]. Şuhûdü’l-hâl: Fahrü’l-müderrisîn Mevlânâ Abdülkerim Efendi, Mevlânâ Receb Efendi b. Sefer, Ömer Bey, Ali Çavuş, Mustafa b. Yusuf, Cafer b. Abdullah, Mustafa b. Yusuf, Mustafa b. Muharrem, Abdülkerim b. Süleyman, Ömer b. Üveys