Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 62 Hüküm no: 4 Orijinal metin no: [2b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Gölpazarı Bayramyeri köyündeki tarla ve orman hisselerinin Hüseyin b. Fethullah’a satılması (…) [Vilâyet-i Anadolu’da Bolu sancağına tâ]bi‘ Gölpazarı kazâsına tâbi‘ Bayramyeri demekle ma‘rûf [karye sâkinlerinden] (…) [bin] Şükrullah nâm kimesne meclis-i şer‘-i hatîr-i lâzımü’t-tevkīrde işbu hâfızü’l-kitâb yine karye-i mezbûre sâkinlerinden Hüseyin b. Fethullah nâm kimesne mahzarında bi’t-tav‘ ve’r-rızâ ikrâr ve takrîr-i kelâm edip karye-i merkūme sınırında [vâki‘] ma‘lûmü’l-hudûd olup beher sene on beş akçe kolluğu olan tarlaların ve yine karye-i merkūme sınırında vâki‘ lede’l-ahâlî ma‘lûmü’l-hudûd taht-ı tasarrufumda olan bir kıt‘a ormanın dahi nısf-ı şâyi‘inin dahi hakk-ı tasarrufunu sâhib-i arz ma‘rifetiyle mezbûr Hüseyin’e tefvîz edip ol dahi minvâl-i muharrer üzre tefevvüz ve kabûl ettikden sonra mukābele-i tefvîzde olan dört bin nakd-i fıddî-i Osmânî râyic fi’l-vakt akçeyi mezbûr Hüseyin yedinden bi’t-tamâm ve’l-kemâl ahz ve kabz eyledim ba‘de’l-yevm sâlifü’l-beyân orman ve tarlaların nısf-ı şâyi‘i mersûmundur sâir emsâli tasarrufu gibi mutasarrıf olsun dedikde mukırr-ı mezbûrun vech-i meşrûh üzre cârî olan ikrâr ve takrîrini el-mukarru lehü’l-mezbûr Hüseyin bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fî evâsıtı Muharremi’l-harâm li sene tis‘a ve ışrîn ve elf min hicreti men lehü’l-izzü ve’ş-şeref. Şuhûdü’l-hâl: Fahrü’l-kuzât Yakub Efendi b. Habib, Osman b. Davud, Mehmed Efendi b. Hüsrev el-Müderris, Ahmed Çelebi b. el-Hâc ( ), Mehmed Efendi b. ( ) bi şehîr el-Müderris, Mustafa b. Mehmed, Mehmed b. Hanefi, Ali b. Abdullah, Yakub b. Kurd.