Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 65 Hüküm no: 8 Orijinal metin no: [3a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Franko v. İstati’nin menzil ile bostan yerini Mehmed Beşe b. Abdullah’a satması Vilâyet-i Rumeli’nde İnebahtı sancağında nefs-i kazâ-i Gerbeniş sâkinlerinden Franko v. İstati nâm zimmî meclis-i şer‘-i hatîr-i lâzımü’t-tevkīrde işbu hâfız-ı hâze’l-kitâb hâssa bostancıyân zümresinden Mehmed Beşe b. Abdullah nâm kimesne mahzarında bi’t-tav‘ ve’r-rızâ ikrâr ve takrîr-i kelâm edip kazâ-i mezbûrda vâki‘ bir tarafdan Kosta v. ( ) mülküne ve bir tarafdan Yani v. Romon mülküne ve bir tarafdan Şiro v. Yorgi mülküne ve bir tarafdan tarîk-i âma müntehî ve mahdûd olup bir tahtânî beyti ve zât-ı eşcâr-ı müsmire ve gayr-ı müsmire[yi] hâvî mülk menzilimi ve menzil-i mezbûra muttasıl ve mülâsık tahmînen bir dönüm mülk bostan yerimi cümle-i tevâbi‘ ve levâhıkı ve kâffe-i menâfi‘ ve merâfıkları ile mezbûr Mehmed Beşe’ye bi safkatin vâhidetin üç bin nakd-i fıddî-i Osmânî râyic fi’l-vakt akçeye bey‘-i sahîh-i şer‘î ile bey‘ ve kabz-ı semen edip mebî‘ât-ı mezkûrâtı mahallinde kabza müşterî-i merkūmu taslît eyledim ba‘de’l-yevm sâlifü’l-[beyân] mebî‘ât-ı mahdûde mezkûr Mehmed Beşe’nin mülk-i müşterâ-yı sarîhidir keyfe mâ yeşâ ve yahtâr mutasarrıf olsun dedikde mukırr-ı mezbûrun vech-i meşrûh üzre cârî olan ikrâr ve takrîrin el-mukarru lehü’l-mezbûr Mehmed Beşe bi’l-muvâcehe tasdîk edicek mâ hüve’l-vâki‘ bi’t-taleb ketb olundu. Hurrire fi’t-târihi’l-mezbûr. Şuhûdü’l-hâl: Osman Bey b. Abd[ullah], Ali Beşe b. Abdullah er-Râcil, Yusuf Bey b. Abdullah el-Cündî Mustafa b. Mehmed, Ali b. Abdullah, Mehmed b. Hanefi, İstati v. Yorgi, Kellepuş v. Yani, Yorgi v. Minho.