Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 64 Hüküm no: 7 Orijinal metin no: [3a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sepetçizâde Vakfı’na ait dükkânın işgal edildiği iddiasıyla dava açılması Medîne-i Ebâ Eyyûb el-Ensârî -râdiye anhu Rabbühü’l-Bârî-’de vâki‘ merhûm (...) nâm kimesne meclis-i şer‘-i hatîr-i lâzımü’t-tevkīrde medîne-i mezbûre mahallâtından Câmi‘-i Kebîr mahallesi sükkânından Osman Çelebi b. Ahmed el-Müezzin nâm kimesne üzerine takrîr-i da‘vâ edip mütevellîsi olduğum vakf-ı mezbûrdan olup medîne-i merkūme sûkunda vâki‘ bir tarafdan Mustafa b. ( ) mülküne ve bir tarafdan diğer Mustafa Ağa b. ( ) tasarrufunda olan dükkâna ve iki tarafdan tarîk-i âma müntehî ve mahdûd bir bâb berber dükkânını ecr-i mislinden noksânıyla mezbûr Osman Çelebi mutasarrıf olup dükkân-ı merkūmu âhara îcârıma merkūm Osman Çelebi mâni‘ olur suâl olunup takrîri tahrîr olunması matlûbumdur dedikde gıbbe’s-suâl mezbûr Osman Çelebi cevâbında fi’l-hakīka zikr olunan dükkân vakf-ı merkūmdan olup bundan akdem icâre-i mu‘accele ve müeccele ile mutasarrıf olan Sepetçizâde demekle şehîr Mehmed Çelebi b. Mahmud nâm kimesne dükkân-ı merkūmun hakk-ı tasarrufunu vakf-ı mezbûr mütevellîsi ma‘rifetiyle Sefer b. Abdullah nâm kimesneye ferâğ edip mukābele-i ferâğda merkūm Sefer yedinden on dört bin nakd-i fıddî-i Osmânî râyic fi’l-vakt akçesin ahz ve kabz edip ol dahi nice müddet mutasarrıf oldukdan sonra dükkân-ı merkūmun hakk-ı tasarrufunu vâlidem merhûme Şirin nâm hâtuna kezâlik izn-i mütevellî ile ferâğ edip mukābele-i ferâğda merkūme yedinden on bir bin nakd-i fıddî-i Osmânî râyic fi’l-vakt akçesin ahz ve kabz edip vâlidem merkūme Şirin Hâtun dahi dükkân-ı mezbûrun hakk-ı tasarrufunu bana ferâğ eyledi, binâen alâ zâlik mezbûrun dükkân-ı merkūmu âhara îcârına mâni‘ olursun dedikde müdde‘î-i mezbûr Ali Halîfe husûs-ı mezbûr minvâl-i muharrer üzre olduğun bi’l-külliyye inkâr edicek mezbûr Osman Çelebi’den sıdk-ı kelâmını mübeyyine beyyine taleb olundukda udûl-i müslimînden Ebûbekir Efendi b. Abdülkādir el-Hatîb ve Ahmed Çelebi b. İbrahim nâm kimesneler li ecli’ş-şehâde meclis-i şer‘a hâzırân olup fi’l-vâki‘ dükkân-ı merkūm bundan akdem Sepetçizâde demekle şehîr mezbûr Mehmed Çelebi’nin icâre-i mu‘accele ve müeccele ile taht-ı tasarrufunda ba‘dehû merkūm Sefer’e fâriğ olup mukābele-i ferâğda yedinden on dört bin akçesin ahz ve kabz edip mezbûr Sefer dahi bunca müddet mutasarrıf oldukdan sonra merkūm Osman Çelebi’nin vâlidesi mezbûre Şirin’e dükkân-ı mezbûrun hakk-ı tasarrufunu ma‘rifet-i mütevellî ile fâriğ olup mukābele-i ferâğda merkūm yedinden on bir bin nakd-i fıddî-i Osmânî râyic fi’l-vakt akçesin ahz ve kabz ettikden sonra merkūme Şirin Hâtun dahi kezâlik bir nice müddet mutasarrıfe oldukdan sonra dükkân-ı mezbûrun hakk-ı tasarrufunu sadrî oğlu mezbûr Osman Çelebi’ye fâriğa oldu. Bu husûsa şâhidleriz şehâdet dahi ederiz deyû edâ-i şehâdet-i şer‘iyye ettiklerinde ba‘de ri‘âyeti şerâiti’l-kabûl mezbûrânın şehâdetleri hayyiz-i kabûlde vâkı‘a oldukdan sonra mâ hüve’l-vâki‘ bi’t-taleb ketb olundu. Hurrire fi’l-yevmi’s-sâlis aşer min Muharremi’l-harâm li sene tis‘a ve ışrîn ve elf. Şuhûdü’l-hâl: Mehmed Ağa b. Hasan, Hüseyin b. Ramazan, el-Hâc Mustafa b. Abdullah el-Hammâmî, Mehmed b. Hüseyin el-Müezzin, Mustafa b. Abdullah el-Hammâmî-i sânî, Osman b. Hamza el-Haffâf, Ali b. Abdullah, Mustafa b. Mehmed, Yakub b. Kurd, Süleyman b. Turgud, Yusuf b. Abdullah Ser-bölük-i muhzırân ve gayruhüm mine’l-hâzırîn.