Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 67 Hüküm no: 10 Orijinal metin no: [3b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Defterî Abdüsselâm Ağa b. Fazlullah’ın menzilini Hasan Çelebi b. Ali’ye satması [Vilâyet-i Rum]ili’nde kasaba-i Süzebolu mahallâtından Hisariçi demekle ma‘rûf mahalle sükkânından olup Dergâh-ı âlî müteferrikalarından fahrü’l-emâcid ve’l-efâhim zübdetü’l-mefâhir ve’l-mekârim Abdüsselâm Ağa b. Fazlullah ed-Defterî meclis-i şer‘-i hatîr-i lâzımü’t-tevkīrde bi’l-fi‘l pâdişâh-ı âlem-penâh hazretlerinin harem-i hâslarında kızlarağası olan mu‘temedü’l-mülûk ve’s-selâtîn enîsü’d-Devleti’l-aliyye celîsü’s-sa‘âdeti’l-sermediyye Mustafa Ağa b. Abdülmennân hazretlerinin saraçbaşıları olan işbu kitâb-ı sedâd-ensâbın hâfızı kıdvetü’l-emâcid ve’l-e‘âlî zübdetü’l-mehâmid ve’l-me‘âlî Hasan Çelebi b. Ali nâm kimesnenin taraf-ı âlîlerinden husûs-ı âti’l-beyânı tasdîka vekîl olup vekâleti hasm-ı şer‘î-i câhid mahzarında Abdüllatif Bey b. Rıdvan el-Cündî ve Şaban b. Abdullah nâm kimesneler şehâdetleri ile şer‘an sâbite olan fahrü’l-eşbâh Mehmed Ağa b. Ömer nâm kimesne mahzarında bi’t-tav‘ ve’r-rızâ ikrâr ve takrîr-i kelâm edip işbu akdin sudûruna değin silk-i mülk-i sahîhimde münselik ve münharıt olan emlâkden olup kazâ-i Havâss-ı Aliyye müzâfâtından nefs-i kasaba-i Çatalca’da vâki‘ iki tarafdan Öküzzâde demek ile şehîr Ahmed Çelebi mülküne ve bir tarafdan ba‘zan çeşmeye ve ba‘zan Ali Beş mülküne ve bir tarafdan tarîk-i âma müntehî ve mahdûd olup iki tahtânî beyti ve sofayı ve bir havuz odası ve bir ahırı ve çatma anbarı ve fırını ve iki ayazmayı ve zât-ı eşcâr-ı müsmire ve gayr-ı müsmireyi hâvî cüneyneyi müştemil mülk menzili cümle-i tevâbi‘ ve levâhıkı ve kâffe-i menâfi‘ ve merâfıkı ile müvekkil-i mûmâ-ileyh Hasan Çelebi’ye otuz altı bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ edip ve kabz-ı semen-i ma‘dûd ve teslîm-i mebî‘ kıldım ba‘de’l-yevm sâlifü’l-beyân menzil-i mahdûd müvekkil-i müşârün-ileyh Hasan Çelebi’nin mülk-i müşterâ-yı sarîhidir keyfe mâ yeşâ ve yürîd mutasarrıf olsun dedikde mukırr-ı mezbûrun vech-i mübeyyen üzre cârî olan ikrâr ve takrîrin vekîl-i müşârün-ileyh Mehmed Ağa bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb ve imlâ olundu. Hurrire fi’l-yevmi’s-sâlis ve’l-ışrîn min Muharremi’l-harâm li sene tis‘a ve ışrîn ba‘de’l-elf. Şuhûdü’l-hâl: Piyâle Ağa b. Abdülmennân, Ahmed Çavuş b. ( ) el-Bostanî, Dâlzâde Mehmed Çelebi b. Mustafa, Ali Çelebi b. Hasan el-Kâtib, Abdüllatif Çelebi b. Rıdvan, Mustafa b. Ali, Mustafa Çelebi b. Memi, Ahmed Çelebi eş-şehîr bi Öküzzâde, Mustafa b. Mehmed, Mehmed b. Hanefi, Ali b. Abdullah, Perviz b. Abdullah, Yakub b. Kurd, Süleyman b. Turgud ve gayruhüm.