Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 68 Hüküm no: 11 Orijinal metin no: [3b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Ağa b. Abdullah’ın arsasını Mahmud Çavuş b. Ahmed’e satması Mahmiye-i Kostantıniyye’de Karagümrük kurbunda sâkin bölük subaşıları cemâ‘atinden fahrü’l-akrân Ahmed Ağa b. Abdullah meclis-i şer‘-i hatîr-i lâzımü’t-tevkīrde işbu hâfız-ı hâze’l-kitâb fahrü’l-cüyûş ve’l-cünûd Mahmud Çavuş b. Ahmed nâm kimesne mahzarında bi’t-tav‘ ve’r-rızâ ikrâr ve takrîr-i kelâm edip Havâss-ı Aliyye müzâfâtından kasaba-i Çatalca’ya tâbi‘ Subaşıköyü demek ile ma‘rûf karyede vâki‘ bir tarafı müşterî-i mezbûr mülküne ve bir tarafı Hasan b. Ömer mülküne ve iki tarafı tarîk-i âma müntehî olan bir kıt‘a arz-ı hâliyemi cümle-i tevâbi‘ ve levâhıkı ve kâffe-i menâfi‘ ve merâfıkı ile müşârün-ileyh Mahmud Çavuş’a dört bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i mebî‘-i ma‘hûd kıldım ba‘de’l-yevm sâlifü’l-beyân hudûd ile mahdûd olan mülk arz-ı hâliye mûmâ-ileyh Mahmud Çavuş’un mülk-i müşterâ-yı sarîhidir keyfe mâ yeşâ ve yahtâr mutasarrıf olsun dedikde mukırr-ı mezbûrun vech-i meşrûh üzre cârî olan ikrâr ve takrîrin el-mukarru lehü’l-mezbûr Mahmud Çavuş bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb ve imlâ olundu. Hurrire fi’l-yevmi’s-sâdis ve’l-ışrîn min Muharremi’l-harâm li sene tis‘a ve ışrîn ve elf mine’l-hicreti men lehü’l-izzü ve’ş-şeref. Şuhûdü’l-hâl: Hüseyin b. Musa el-Cündî, İmâm-ı Sultan Süleyman Hân Hüseyin Çelebi, Mehmed b. Abdullah, karye-i mezbûre imâmı Ahmed Efendi, Mehmed b. Hanefi, Perviz b. Abdullah, Yakub b. Kurd, Süleyman b. Turgud, Mustafa b. Mehmed ve gayruhüm mine’l-hâzırîn.