Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 70 Hüküm no: 15 Orijinal metin no: [4a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İstati v. Yani’nin tarlasının kullanım hakkını Dimo v. Yani’ye devretmesi Vilâyet-i Rumeli’nde Gerbeniş kazâsına tâbi‘ Sambatina nâm karye sâkinlerinden İstati v. Yani nâm zimmî meclis-i şer‘-i hatîr-i lâzımü’t-tevkīrde işbu râfi‘ü’l-kitâb Dimo v. Yani nâm zimmî muvâcehesinde bi’t-tav‘ ve’r-rızâ ikrâr ve takrîr-i kelâm edip karye-i merkūmede vâki‘ bir tarafdan İstati v. Yorgi tarlasına ve bir tarafdan Yani v. İstemad tarlasına ve bir tarafdan Yorgi v. ( ) tarlasına ve bir tarafdan diğer Yorgi Papalavli tarlasına müntehî olup tahmînen diyârımız keyli ile on keyl tohum istî‘âb eder bir kıt‘a taht-ı tasarrufumda olan tarlanın hakk-ı tasarrufunu sâhib-i arz ma‘rifetiyle mezbûr Dimo’ya tefvîz edip ol dahi minvâl-i muharrer üzre tefevvüz ve kabûl ettikden sonra mukābele-i tefvîzde olan iki bin altı yüz nakd-i fıddî-i Osmânî râyic fi’l-vakt akçeye mezbûr Dimo yedinden bi’t-tamâm ve’l-kemâl ahz ve kabz ettim ba‘de’l-yevm sâlifü’l-beyân tarlanın hakk-ı tasarrufu mersûmundur sâir emsâli tasarrufu gibi mutasarrıf olsun dedikde mukırr-ı mezbûrun vech-i meşrûh üzre cârî olan ikrâr ve takrîrin el-mukarru lehü’l-mezbûr Dimo bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’t-tâsi‘ ve’l-ışrîn min Muharremi’l-harâm li sene tis‘a ve ışrîn ve elf. Şuhûdü’l-hâl: Mehmed b. Hanefi, Mustafa b. Turgud, Yani v. Dimo, Androni v. Lefkarindi, İstati [v.] Kalani, Dimo [v.] Kalani, Yorgi [v.] Papa Ladisli ve gayruhüm.