Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 72 Hüküm no: 18 Orijinal metin no: [4a-6] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Beşe b. Abdullah’ın menzilini Yani v. Diyani’ye satması Vilâyet-i Rumeli’nde nefs-i Göllükesri kazâsı mahallâtından Varlam nâm mahalle sükkânından Mehmed Beşe b. Abdullah nâm râcil meclis-i şer‘-i hatîr-i lâzımü’t-tevkīrde işbu râfi‘ü hâze’l-kitâb Yani v. Diyani nâm zimmî muvâcehesinde bi’t-tav‘ ve’r-rızâ ikrâr ve takrîr-i kelâm edip mahalle-i mezbûrede vâki‘ bir tarafdan Kiryazi v. Nikola mülküne ve bir tarafdan Nikola v. Panayot mülküne ve bir tarafdan Foça v. ( ) mülküne ve bir tarafdan Aleksi v. Dimitri mülküne müntehî ve bir tarafdan Pano v. Manol mülküne müntehî olup bir tahtânî beyti ve zât-ı eşcâr-ı müsmire ve gayr-ı müsmireyi hâvî cüneyneyi müştemil mülk menzilimi cümle-i tevâbi‘ ve levâhıkı ve kâffe-i menâfi‘ ve merâfıkı ile mesfûr Yani’ye üç bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen edip mebî‘-i mezkûru mahallinde kabza müşterî-i merkūmu taslît eyledim ba‘de’l-yevm sâlifü’l-beyân menzil-i mahdûd-ı mezkûr Yani’nin mülk-i müşterâ-yı sarîhidir keyfe mâ yeşâ ve yahtâr mutasarrıf olsun dedikde mukırr-ı mezbûrun vech-i meşrûh üzre cârî olan ikrâr ve takrîrin [4b] el-mukarrun lehü’l-mezbûr Yani bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fî selhi Muharremi’l-harâm li sene tis‘a ve ışrîn ve elf. Şuhûdü’l-hâl: Ali b. Rıdvan, şâtır Mehmed b. İlyas, Halil b. Arslan, Hasan Beşe b. Abdullah er-Râcil, Ahmed Beşe b. Abdullah er-Râcil, Mustafa b. Mehmed, Mehmed b. Hasan, Ali b. Abdullah, Yakub b. Kurd, Perviz b. Abdullah, Yusuf b. Abdullah ve gayruhüm mine’l-hâzırîn.