Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 73 Hüküm no: 19 Orijinal metin no: [4b-1, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Subaşı Ahmed Ağa b. Emrullah’ın Çatalca’daki evini Şaban b. Abdullah Vakfı’na istiğlâl yoluyla sattığı Medîne-i mahmiye-i Kostantıniyye mahallâtından Karagümrük mahallesinde sâkin olan fahrü’l-emâcid ve’l-ekârim subaşı Ahmed Ağa b. Emrullah nâm kimesne, menzilini merhûm Şaban b. Abdullah vakfı’na mütevellî olan hâmil-i hâze’l-kitâb fahrü’l-akrân el-Hâc Yusuf b. Abdullah’a bey‘ ettiğini meclis-i şer‘-i şerîf ve mahfil-i dîn-i münîfde -el-masûn ani’t-tağyîr ve’t-tahrîf- ikrâr ve i‘tirâf etti. Mütevellî-i mezbûr da vakf-ı mezbûr malıyla ve istiğlâl için işbu akdin sudûruna kadar mezbûr Ahmed Ağa’nın sâhibi ve mâliki olduğu elinde ve taht-ı tasarrufunda bulundurduğu Havâss-ı Aliyye kazâsı müzâfâtından Çatalca nâhiyesinde vâki‘ Subaşı karyesinde kâin, dört tarafdan tarîk-i âm ile mahdûd olan eşcâr-ı müsmire ve gayr-ı müsmireli bahçeyi, gölgeliği, fırını, selâmlığı ve helâyı hâvî, iç ve dış havlulu olan menzili cümle tevâbi‘ ve levâhıkı ve âmme-i menâfi‘ ve merâfıkı ile râyicü’l-vakt yetmiş bin akçe-i Osmânî semen-i mu‘ayyen-i makbûz mukābilinde iştirâ etti. Mezbûr Ahmed Ağa’nın menzili kirâlamak istemesi üzerine ba‘de’t-tahliyye ve’t-tekābuz zeyilde mezkûr târihden i‘tibâren iki sene tamâmına on dört bin akçe ücret mukābilinde ana icâreye verdi. Mütevellî-i mezbûr mukırr-ı mezbûrun vâki‘ ikrârını vicâhen ve şifâhen tasdîk etti. Mahalle-i mezbûrede sâkin olan fahrü’l-eşbâh Mahmud Çavuş b. Ahmed nâm kimesne menzil-i mezbûrun derkine ve ücret-i merkūmeye ve asl-ı meblağ-ı merkūma îcâb ve kabûlü hâvî kefâletle kefîl oldu. Sonra mukırr-ı mezbûr, süre nihâyetinde borcunu ödeyemezse veya gāib olursa merkūm Mahmud Çavuş’u menzil-i mezbûrun bey‘ine ve semeninin kabzına ve vakıf cânibine olan deyninin edâsına ve semenden artan bir şey kalırsa kendisine ödemeye vekîl etti. O da vekâlet-i mezbûreyi kabûl edip hizmet-i lâzımesini edâyı ta‘ahhüd etti. Cerâ zâlike ve hurrire fî evâsıtı Muharremi’l-harâm sene tis‘a ve ışrîn ba‘de’l-elf mine’l-hicreti men lehü’l-ızzü ve’ş-şeref. Şuhûdü’l-hâl: Mehmed Efendi b. eş-Şeyh Ahmed el-İmâm, Mahmud Halîfe b. Pîrî el-Müezzin, Sâlih Efendi b. Veli el-İmâm, diğer Sâlih Efendi b. Hasan el-İmâm, Abdülkerim b. Abdullah, Mustafa b. Mehmed, el-Hâc Keyvan b. Abdullah, el-Hâc Mustafa b. Abdullah, el-Hâc Ahmed b. Hasan, Osman Çelebi b. Ahmed, Mehmed b. Hanefi ve gayruhüm mine’l-hâzırîn.