Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 82 Hüküm no: 32 Orijinal metin no: [6b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şeyh Merkez Efendi Vakfı’na ait hamamın Mustafa b. Yakub’a kiralanması Dârü’s-saltanati’s-seniyye Kostantıniyye el-mahmiyye hısnı ebvâbından Yenikapı hâricinde vâki‘ merhûm ve mağfûr eş-Şeyh Merkez Efendi -kuddise sırruhü’l-azîz-’in evkāf-ı şerîfelerine ber mûceb-i şart-ı vâkıf mütevellî olan zü’n-nesebi’t-tâhir ve’l-hasebi’l-fâhir es-Seyyid Mehmed Efendi b. es-Seyyid Ali meclis-i şer‘-i şerîf-i Nebevî ve mahfil-i dîn-i münîf-i Mustafavî’de işbu hâfız-ı hâze’l-kitâb Mustafa b. Yakub nâm kimesne mahzarında ikrâr-ı tâm ve ta‘bîr-i kelâm edip evkāf-ı mezbûreden olup merhûm-ı müşârün-ileyh hazretlerinin câmi‘-i şerîf ve ma‘bed-i latîfleri kurbunda vâki‘ vakf-ı mezbûra intimâ ile tecdîd ve tavsîfden müstağnî olan çifte hamam îcâr olunmak lâzım gelmeğin ba‘de’l-müzâyede fi’l-icâre seneliği mezbûr Mustafa üzerinde ba‘de inkıtâ‘i’r-rağabât altı bin nakd-i râyic fi’l-vakt akçede karâr etmeğin hamam-ı mezbûru tevliyyet-i mahkiyem hasebiyle işbu sene tis‘a ve ışrîn ba‘de’l-elf Saferü’l-muzafferi’nin gurresinden iki sene tamâmına varınca on iki bin nakd-i fıddî-i Osmânî râyic fi’l-vakt akçeye mezbûr Mustafa’ya îcâr edip merkūm dahi minvâl-i muharrer üzre istîcâr ve kabûl ettikden sonra beher sene cânib-i vakfa altı bin akçe haklaşmak üzre ta‘ahhüd eyledi dedikde mütevellî-i mezbûr es-Seyyid Mehmed Efendi’nin vech-i mübeyyen üzre cârî olan ikrâr ve takrîrin el-mukarru lehü’l-mezbûr Mustafa bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb ve imlâ ve tahrîr [ve] inşâ olunup yed-i tâlibe def‘ ve vaz‘ olundu. Hurrire fi’l-yevmi’s-sâdis min Saferi’l-hayr li sene tis‘a ve ışrîn ve elf. Şuhûdü’l-hâl: Ali Halîfe b. Ahmed el-İmâm, Osman b. Mustafa, Ali Halîfe b. Kurd el-Müezzin, Mustafa b. İskender el-Kayyım, Mustafa b. Mehmed, Ali b. Abdullah, Perviz b. Abdullah ve Süleyman b. Turgud, Mehmed b. Hanefi ve gayruhüm mine’l-hâzırîn.