Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 81 Hüküm no: 31 Orijinal metin no: [6a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yani v. Yorgi’nin tarlalarının kullanım hakkını Dimo v. Nikola’ya devretmesi Vilâyet-i Rumeli’nde Mora sancağına Kartina kazâsına tâbi‘ Pavye nâm karye sâkinlerinden Yani v. Yorgi nâm zimmî meclis-i şer‘-i hatîr-i lâzımü’t-tevkīrde işbu hâfızü’l-kitâb Dimo v. Nikola nâm zimmî mahzarında bi’t-tav‘ ve’r-rızâ ikrâr ve takrîr-i kelâm edip ve karye-i mezbûre kurbunda mevâzi‘-i müte‘addidede vâki‘ her biri inde ahâliyi’d-diyâr ma‘lûmü’l-hudûd ve’l-mikdâr tahmînen sekiz keyl tohum istî‘âb eder altı kıt‘a taht-ı tasarrufumda olan tarlaların hakk-ı tasarrufunu sâhib-i arz ma‘rifetiyle mezbûr Dimo’ya tefvîz edip ol dahi minvâl-i muharrer üzre tefevvüz ve kabûl ettikden sonra mukābele-i tefvîzde olan üç bin nakd-i fıddî-i Osmânî râyic fi’l-vakt akçeyi mezbûr Dimo yedinden bi’t-tamâm ve’l-kemâl ahz ve kabz eyledim ba‘de’l-yevm sâlifü’l-beyân tarlaların hakk-ı tasarrufları merkūmundur, sâir emsâli tasarrufu gibi mutasarrıf olsun dedikde mukırr-ı mezbûrun vech-i meşrûh üzre cârî olan ikrâr ve takrîrin el-mukarru lehü’l-mezbûr Dimo bi’l-muvâcehe tasdîk ve bi’l-müşâfehe tahkīk edicek mâ vaka‘a bi’t-taleb ketb olundu. Hurrire fi’l-yevmi’s-sâlis min Saferi’l-hayr li sene tis‘a ve ışrîn ba‘de’l-elf. Şuhûdü’l-hâl: Rıdvan Ağa b. Abdullah, Mehmed Bey eş-şehîr bi ibni Alaybeyi, Mihal v. Aleksi, Yorgi v. Yani, Dimo v. Kosta, Dimo v. Nikola, Panayot v. Todori, Velisari Bezzâzcı, Yani v. İstemad ve gayruhüm mine’l-hâzırîn.