Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 165 Hüküm no: 124 Orijinal metin no: [16b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin b. Ömer’in kardeşi Hacı Mehmed’in oturduğu ev üzerindeki odayı kendi parasıyla yaptırdığı iddiasının reddi Mahmiye-i İstanbul’da Mesih Paşa mahallesinde sâkin Hüseyin b. Ömer nâm kimesne meclis-i şer‘de li eb karındaşı olup zikri âtî odaya vâzı‘ü’l-yed olduğu şer‘an sâbit olan el-Hâc Mehmed mahzarında üzerine da‘vâ ve takrîr-i kelâm edip merhûm Veznedâr Ahmed Ağa vakfı’ndan olup mahalle-i mezkûrede vakı‘a lede’l-ahâlî ve’l-cîrân ma‘lûmü’l-hudûd icâreteyn-i ma‘lûmeteyn ile mezbûr Hacı Mehmed’in tasarrufunda olan menzil hissesi üzerine mukaddemâ kendi malım ve mezbûr Hacı Mehmed emri ve izn-i mütevellî ile bir bâb tahtânî oda binâ etmişidim, hâlâ oda-i mezkûrenin binâsına mezkûr Hacı Mehmed bi gayrı hakkın vaz‘-ı yed eder suâl olunup ihkāk-ı hak olunmak matlûbumdur dedikde, gıbbe’s-suâl mezkûr Hacı Mehmed zikr olunan odaya vaz‘-ı yedini ikrâr, lâkin vech-i meşrûh üzre merkūm Hüseyin kendi malıyla binâ eylediğini inkâr edicek müdde‘î-i mezbûr Hüseyin’den müdde‘âsını mübeyyine beyyine taleb olundukda ityân-ı beyyineden izhâr-ı acz edip istihlâf etmeğin fi’l-hakīka zikr olunan arsa üzerine kendi malıyla ve izn-i mütevellî ile mülkü olmak üzre bir bâb tahtânî oda binâ eyleyip müdde‘î-i merkūm Hüseyin’e emr edip ol dahi vech-i muharrer üzre zikr olunan odayı kendi malıyla mülkü olmak üzre binâ ettiğine merkūm Hacı Mehmed’e yemîn teklîf olundukda ol dahi alâ vefki’l-mes’ûl yemîn billâhi te‘âlâ etmeğin mûcebiyle bilâ-beyyine mu‘ârazadan merkūm Hüseyin men‘ olunup mâ vaka‘a bi’t-taleb ketb olundu. Fi’l-yevmi’s-sânî aşer min Cumâdelûlâ li sene [10]77. Şuhûdü’l-hâl: İbrahim Çelebi [b.] Ahmed, Şükrullah Bey b. Mustafa, Abdi Çelebi b. Hüseyin, Mustafa Çelebi [b.] Ahmed.