Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 83 Hüküm no: 34 Orijinal metin no: [6b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Madelkari v. İstirati’nin menzili ile bağlarını Manol v. Lohnista’ya satıp bir adet çayırının da kullanım hakkını devretmesi Havâss-ı Aliyye kazâsı müzâfâtından kasaba-i Midye’den Analibo mahallesinde sâkin Madelkari v. İstirati nâm zimmî meclis-i şer‘-i hatîr-i lâzımü’t-tevkīrde işbu hâmilü’l-kitâb Manol v. Lohnista nâm zimmî mahzarında bi’t-tav‘ ve’r-rızâ ikrâr ve takrîr-i kelâm edip mahalle-i mezbûrede vâki‘ bir tarafı İskender nâm kimesne mülküne ve bir tarafı Ali b. Abdullah mülküne ve bir tarafı Hasan Beşe b. ( ) mülküne ve bir tarafı tarîk-i âma müntehî olup bir fevkānî ve bir tahtânî beyti müştemil olan mülk menzilimi ve mevâzi‘-i müte‘addidede vâki‘ her biri inde ahâliyi’d-diyâr ma‘lûmü’l-hudûd ve’l-mikdâr tahmînen üç dönüm üç kıt‘a mülk bağlarımı cemî‘-i tevâbi‘ ve levâhıkı ve kâffe-i menâfi‘ ve merâfıkı ile mezbûr Manol’e on iki bin nakd-i râyic fi’l-vakt fıddî akçeye bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i mebî‘ât-ı mahdûde kıldığımdan sonra yine kasaba-i merkūme sınırında Armutluk demekle ma‘rûf mevzi‘de vâki‘ bir kıt‘a çayırın dahi hakk-ı tasarrufunu sâhib-i arz ma‘rifetiyle mezbûr Manol’e tefvîz edip ol dahi tefevvüz ve kabûl ettikden sonra mukābele-i tefvîzde olan altı yüz nakd-i fıddî-i Osmânî râyic fi’l-vakt akçeyi mezbûr Manol yedinden bi’t-tamâm ve’l-kemâl ahz ve kabz eyledim ba‘de’l-yevm sâlifü’l-beyân emlâk-i merkūme Manol’ün mülk-i müşterâ-yı sarîhidir ve mârrü’z-zikr çayırın dahi hakk-ı tasarrufu mersûmundur sâir emsâli tasarrufu gibi mutasarrıf olsun dedikde mukırra-i mezbûrun vech-i mübeyyen üzre cârî olan ikrâr ve takrîrin el-mukarru lehü’l-mezbûr Manol bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb ve imlâ olundu. Hurrire fi’l-yevmi’s-sâdis min Saferi’l-hayr li sene tis‘a ve ışrîn ba‘de’l-elf. Şuhûdü’l-hâl: Mustafa Beşe b. Abdullah er-Râcil, Kasım Beşe b. Mustafa er-Râcil, Cafer [b.] Derviş, Süleyman b. Turgud, Mustafa b. Mehmed, Kaloyani v. Frankola, Manol v. Kostantin, Yorgi v. Kaltiriz, Kostantin v. Yorgi ve gayruhüm.