Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 84 Hüküm no: 35 Orijinal metin no: [6b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yani v. Solat’ın bağını İstati v. Hafodviş’e satması İnebahtı sancağında Yenişehir kazâsı müzâfâtından Kûhistan nâhiyesine tâbi‘ Mastroyani demekle ma‘rûf karyeden Yani v. Solat nâm zimmî meclis-i şer‘-i hatîr-i lâzımü’t-tevkīrde işbu hâmilü’l-kitâb yine nâhiye-i mezbûreye tâbi‘ Karviliş nâm karyeden İstati v. Hafodviş nâm zimmî mahzarında bi’t-tav‘ ve’r-rızâ ikrâr ve takrîr-i kelâm edip karye-i mezbûre Mastroyani kurbunda vâki‘ bir tarafdan Dimo v. İskarlet bağına ve bir tarafdan İstati v. Şirvili bağına ve bir tarafdan vâdiye ve bir tarafdan ormanlığa müntehî tahmînen yirmi beş çapalık bir kıt‘a mülk bağımı cümle-i tevâbi‘ ve levâhıkı ile mezbûr İstati’ye beş bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen edip mebî‘-i mezkûru mahallinde kabza müşterî-i merkūmu taslît eyledim ba‘de’l-yevm sâlifü’l-beyân bağ-ı mahdûd mezkûr İstati’nin mülk-i müşterâ-yı sarîhidir keyfe mâ yeşâ mutasarrıf olsun dedikde mâ hüve’l-vâki‘ bi’t-taleb ketb olundu. Hurrire fî gurreti Saferi’l-hayr li sene tis‘a ve ışrîn ba‘de’l-elf. Şuhûdü’l-hâl: Mustafa b. Mehmed, Mehmed b. Hüseyin, Ali b. Abdullah, Süleyman [b.] Turgud, Yakub b. Kurd, Todori v. Potama, Andriye v. Apostol, Lamo v. Mihal, Rizo v. Apostol, Hristo v. Yani, Dimo v. Yani, Hristo v. İlya, Yani v. Dimo.