Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 85 Hüküm no: 37 Orijinal metin no: [7a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Pano v. Yorgi’nin menzili ile arsa hissesini Niko v. Duka’ya satması Vilâyet-i Rumeli’nde Avlonya sancağında Ergirikasrı kazâsına tâbi‘ Sinagopolo[s] nâm karye sâkinlerinden Pano v. Yorgi nâm zimmî meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Niko v. Duka nâm zimmî mahzarında bi’t-tav‘ ve’r-rızâ ikrâr ve takrîr-i kelâm edip karye-i mezbûrede vâki‘ bir tarafı Kiro v. Niko mülküne ve bir tarafı Dimo v. Duka mülküne ve bir tarafı Dimo v. Nika mülküne ve bir tarafı yine müşterî-i mezbûr mülküne müntehî olup iki tahtânî beyti ve bir çardağı müştemil mülk menzilden ve yine menzil-i mezbûra muttasıl ve mücâvir bir mikdâr arz-ı hâliyeden bana isâbet eden nısf hisse-i şâyi‘amı cümle-i tevâbi‘ ve levâhıkı ve kâffe-i menâfi‘ ve merâfıkı ile mezbûr Niko’ya beş bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen edip mebî‘-i mezkûru mahallinde kabza müşterî-i merkūmu taslît eyledim ba‘de’l-yevm sâlifü’l-beyân menzil ve arz-ı hâliyeden bana isâbet eden nısf hisse-i şâyi‘alarım merkūm Niko’nun mülk-i müşterâ-yı sarîhidir keyfe mâ yeşâ ve hasbe mâ yürîd mutasarrıf olsun dedikde mukırr-ı mezbûrun vech-i mübeyyen üzre cârî olan ikrâr ve takrîrin el-mukarru lehü’l-mezbûr Niko bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’s-sânî aşer li târihi’l-mezbûr. Şuhûdü’l-hâl: Ali b. Abdullah, Süleyman b. Turgud, Yakub b. Kurd, Yorgi v. Dimo, Duka v. Dedo, Yorgi v. Mankol, Kiro v. Nika, Rika v. Dimo, Kenili v. Polaki, Duka v. Mankol ve gayruhüm mine’l-hâzırîn.