Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 86 Hüküm no: 38 Orijinal metin no: [7a-3, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şaban b. Ömer’in evini Mustafa Çelebi Vakfı’na istiğlâl yoluyla sattığı Ebâ Eyyûb el-Ensârî -radiye anhu Rabbühü’l-Bârî- mahallâtından Dökümcübaşı mahallesinde sâkin olan Şaban b. Ömer nâm kimesne meclis-i şer‘-i şerîf ve mahfil-i dîn-i münîfde -el-masûn ani’t-tağyîr ve’t-tahrîf- hâzır olup menzilini merhûm Mustafa Çelebi vakfı’na mütevellî olan hâmil-i hâze’l-kitâb Fazlullah Halîfe b. Ali’ye bey‘ ettiğini ikrâr ve i‘tirâf etti. O da Şaban b. Ömer’in işbu akdin sudûruna kadar sâhibi ve mâliki olduğu elinde ve taht-ı tasarrufunda bulundurduğu mahalle-i mezbûrede vâki‘ ve bir tarafdan Lâlezar Hâtun bt. Abdullah mülkü, diğer tarafdan Hacı Hasan b. Abdullah mülkü, öbür tarafdan merhûm ( ) câmi‘i ve diğer tarafdan da tarîk-i hâs ile mahdûd olan menzil-i mezkûru cümle tevâbi‘ ve levâhıkı ve kâffe-i menâfi‘ ve merâfıkı ile râyicü’l-vakt dört bin akçe-i Osmânî semen-i mu‘ayyen-i makbûzla ve vakf-ı mezbûr malıyla istiğlâl için iştirâ etti. Bâyi‘-i mezbûrun menzil-i merkūmu kirâlamak istemesi üzerine müşterî-yi mezbûr, ba‘de’t-tahliyye ve’t-tekābuz, zeyl-i kitâbda mezkûr târihden i‘tibâren üç sene tamâmına bin beş yüz akçe ücret-i kirâ mukābilinde icâreye verdi. Mütevellî-i mezbûr vâki‘ ikrârı vicâhen ve şifâhen tasdîk etti. Cerâ zâlike ve hurrire fi’l-yevmi’r-râbi‘ ışrîn li târihi’l-mezbûr. Şuhûdü’l-hâl: El-Hâc Ahmed b. İbrahim, Veli Halîfe b. Abdullah, Halil b. Mehmed, Musli Çelebi b. Hasan, Mustafa b. Hayrullah el-Müezzin, el-Hâc Receb b. Yusuf