Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 95 Hüküm no: 51 Orijinal metin no: [9a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abdülkâdir Çelebi b. Ali Ağa’nın menzilini Mehmed b. Abdullah’a satması Mahmiye-i Kostantıniyye -humiyet ani’l-âfât ve’l-beliyye- mahallâtından Emir Sinan mahallesi sükkânından Abdülkādir Çelebi b. Ali Ağa nâm kimesne meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Mehmed b. Abdullah nâm kimesne mahzarında bi’t-tav‘ ve’r-rızâ ikrâr ve i‘tirâf edip kazâ-i Havâss-ı Aliyye müzâfâtından Terkos nâhiyesine tâbi‘ Çilingir demekle ma‘rûf karyede vâki‘ bir tarafı Hasan Beşe b. Abdullah nâm râcil mülküne ve bir tarafı Handan Bey nâm cündî mülküne ve bir tarafı Fâtıma Hâtun bt. ( ) mülküne ve bir tarafı tarîk-i âma müntehî iki tahtânî beyti ve bir fırını ve bir ahırı ve bi’r-i mâyı ve havluyu ve bir dut ağacını müştemil mülk menzilimi cümle-i tevâbi‘ ve levâhıkı ve kâffe-i menâfi‘ ve merâfıkı ile mezbûr Mehmed’e on iki bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i mebî‘-i mahdûd eyledim ba‘de’l-yevm sâlifü’l-beyân menzil-i mahdûd mezkûr Mehmed’in mülk-i müşterâ-yı sarîhidir keyfe mâ yeşâ ve yahtâr mutasarrıf olsun dedikde mukırr-ı mezbûrun vech-i mübeyyen üzre cârî olan ikrâr ve takrîrini el-mukarru lehü’l-mezbûr Mehmed bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’s-sâbi‘ ve’l-ışrîn min Saferi’l-hayr li târihi’l-mezbûr. Şuhûdü’l-hâl: Mahmud b. Hüseyin, Hasan b. Mehmed, Ahmed b. Yusuf, İbrahim b. Bayezid, Hüseyin b. Süleyman, Mehmed Çavuş b. Ahmed, Mehmed b. Hanefi, Süleyman b. Turgud ve gayruhüm.