Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 94 Hüküm no: 50 Orijinal metin no: [8b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Meyram bt. Musrof ile Süleyman’ın şartlı talak yoluyla boşanması Mahmiye-i Kostantıniyye -humiyet ani’l-âfât ve’l-beliyye-de Küçükkaraman kurbunda sâkin olup husûs-ı âti’l-beyânı ikrâr ve takrîre vekîl olup vekâleti hasm-ı şer‘î-i câhid mahzarında Ahmed Beşe b. Ali er-Râcil ve es-Seyyid Nuh b. Musa şehâdetleriyle sâbite olan Hasan b. Abdullah nâm kimesne meclis-i şer‘-i hatîr-i lâzımü’t-tevkīrde işbu hâmiletü hâze’l-kitâb Meyram bt. Musrof nâm nasrâniye muvâcehesinde takrîr-i kelâm edip bundan akdem merkūme Meyram’ın zevci olup gāib ani’l-meclis olan dayım Süleyman b. ( ) nâm kimesne kendiye âhar diyâra sefer lâzım geldiğini ihzâr [ihbâr] edip zevcem mezbûreyi altı ay tamâmına dek infâk [ve] iksâsına ve sâir levâzım-ı ma‘hûdesine murâd eylediği mikdâr meblağ harc ve sarf eyle ve dahi altı ay tamâmına değin gitdiğim seferden gelmezsem zevcem mezbûreyi tatlîk eyle demişdi el-hâletü hâzihî dayım mezbûr Süleyman üç senedir gāib olmağın mezbûreyi infâk ve iksâsına iktidârım olmamağın ben dahi vekâlet-i mahkiyem hasebiyle mezbûreyi tatlîk eyledim ba‘de’l-yevm merkūme kendi murâd eylediği kimesneye tezevvüc eylesin dedikde vekîl-i mezbûr Hasan’ın minvâl-i [muharrer] üzre cârî olan ikrâr ve takrîrin merkūme Meyram bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’s-sâbi‘ min Saferi’l-hayr li sene tis‘a ve ışrîn ba‘de’l-elf. Şuhûdü’l-hâl: Hüseyin b. Kubad, Mustafa Çelebi b. Ali Çukadâr, Mustafa b. Mehmed, Mehmed b. Hanefi, Yakub b. Kurd, Perviz b. Abdullah, Ali b. Abdullah.