Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 96 Hüküm no: 53 Orijinal metin no: [9a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Apostol v. Franko’nun değirmeninin yarım hissesini Şaban Bey b. Abdullah’a satması Havâssu’s-Sultâniyye kazâsı müzâfâtından Şahteroz nâm karye sâkinlerinden Apostol v. Franko nâm zimmî meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Şaban Bey b. Abdullah nâm râcil mahzarında bi’t-tav‘ ve’r-rızâ ikrâr ve takrîr-i kelâm edip karye-i mezbûrede cârî olan ayazma suyu ile dâire bir göz mülk değirmenin nısfını cümle-i tevâbi‘ ve levâhıkı ve kâffe-i menâfi‘ ve merâfıkı ile mezbûr Şaban Bey’e üç bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i mebî‘-i mezkûr kıldım ba‘de’l-yevm sâlifü’l-beyân değirmenin nısfı merkūm Şaban Bey’in mülk-i müşterâ-yı sarîhidir keyfe mâ yeşâ ve yahtâr mutasarrıf olsun dedikde mukırr-ı mezbûrun vech-i mübeyyen üzre cârî olan ikrâr ve takrîrin el-mukarru lehü’l-mezbûr Şaban Bey bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’s-sâbi‘ ve’l-ışrîn min Saferi’l-hayr li târihi’l-mezbûr. Şuhûdü’l-hâl: Musa Halîfe b. Mahmud el-İmâm, Mehmed Halîfe b. Ali el-Müezzin, Mustafa Beşe b. Mahmud er-Râcil, Musli Reis b. Abdullah, Mehmed b. Receb el-Cündî el-Hâc Firkad b. ( ), Ramazan Efendi b. Mustafa, Abdi Beşe b. Abdullah er-Râcil, el-Hâc Rıdvan b. Abdullah, Hasan b. Abdullah, Âşık Hasan b. Abdullah, Memi Reis b. Abdullah, Dimitri v. Kinola, kuyumcu Mihal, Petro v. Pasko, Todoro v. Karaca.