Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 96 Hüküm no: 54 Orijinal metin no: [9a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin b. Hasan’ın Turşucuzâde Hüseyin Çelebi Vakfı’na borcu olduğu Medîne-i Ebâ Eyyûb-i Ensârî -râdiye anhu Rabbühü’l-Bârî- tevâbi‘inden Hasköy mahallâtından Pîrî Paşa mahallesinde sâkin Hüseyin b. Hasan nâm kimesne meclis-i şer‘-i şerîf-i lâzımü’t-teşrîfde merhûm Turşucuzâde Hüseyin Çelebi vakfı’na bi’l-fi‘l mütevellî olan işbu hâfız-ı hâze’l-kitâb Hüsrev b. Abdullah nâm kimesne mahzarında ikrâr ve takrîr-i kelâm edip zimmetimde vakf-ı mezbûr malından dört bin akçe cihet-i karzdan ve târih-i kitâb senesinde vâki‘ Muharremü’l-harâm’ın gurresinden üç sene tamâmına dek bin iki yüz akçe müeccel vakf-ı mezbûr malıyla iştirâ olunmuş beynimizde ma‘lûm çuka bahâsından cem‘an beş bin iki yüz akçe deynim olup mukābelesinde silk-i mülkümde münselik ve münharıt bir kâtibî yenli mor ferâce ve bir yeşil ferâce ve beynimizde ma‘lûm mâî taşlı bir altın yüzük mütevellî-i mezbûr Hüsrev’in yedinde rehn-i makbûzdur dedikde merkūm Hüseyin’in cârî olan ikrâr ve takrîrin mütevellî-i mezbûr Hüsrev bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’s-sâdis ve’l-ışrîn min Saferi’l-hayr li târihi’l-mezbûr. Şuhûdü’l-hâl: İbrahim b. Bâli, Mustafa Çelebi b. Mahmud el-Müezzin, Kasım b. Ali, Mehmed Çelebi b. Haydar el-Kâtib, Süleyman b. Turgud, Yakub b. Kurd, Mehmed b. Hanefi ve gayruhüm mine’l-hâzırîn.