Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 105 Hüküm no: 67 Orijinal metin no: [11a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Bey b. Abdullah’ın menzilini Sefer Beşe b. Ali’ye satması Medîne-i Ebâ Eyyûb el-Ensârî -râdiye anhu Rabbühü’l-Bârî- mahallâtından Takyecibaşı mahallesi sükkânından Mehmed Bey b. Abdullah nâm kimesne meclis-i şer‘-i hatîr-i lâzımü’t-tevkīrde işbu hâmilü’l-kitâb Sefer Beşe b. Ali nâm râcil mahzarında bi’t-tav‘ ve’r-rızâ ikrâr ve takrîr-i kelâm edip mahalle-i mezbûrede vâki‘ bir tarafdan Mehmed Çelebi b. Mahmud mülküne ve bir tarafdan Çilingir ( ) mülküne ve bir tarafdan tarîk-i âma müntehî ve mahdûd olup üç fevkānî beyti ve iki tahtânî beyti ve ahırı ve zât-ı eşcâr-ı müsmire ve gayr-ı müsmireyi hâvî cüneyneyi ve tahta-pûşu müştemil mülk menzilimi cümle-i tevâbi‘ ve levâhıkı ve kâffe-i menâfi‘ ve merâfıkı ile ile mesfûr Sefer Beşe’ye otuz bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ edip ve kabz-ı semen-i ma‘dûd ve teslîm-i mebî‘-i mahdûd kıldım ba‘de’l-yevm sâlifü’l-beyân menzil-i mahdûd mezkûr Sefer Beşe’nin mülk-i müşterâ-yı sarîhidir keyfe mâ yeşâ ve yahtâr mutasarrıf olsun dedikde mukırr-ı mezbûrun vech-i mübeyyen üzre cârî olan ikrâr ve takrîrin el-mukarru lehü’l-mezbûr Sefer Beşe bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fî gurreti Rebî‘ilevvel li sene tis‘a ve ışrîn ve elf. Şuhûdü’l-hâl: Mehmed Efendi b. Hasan el-İmâm, Hüsam Halîfe b. Abdurrahman, Mehmed Çelebi b. Mahmud er-Râcil, Mehmed Çelebi b. Abdülganî, el-Hâc Hamza b. Kasım el-Cerrâh, Mustafa b. Hamza, Ahmed Çelebi b. Mustafa, Mustafa Çelebi b. Ali, Musli Çelebi b. Sadi el-Bevvâbü’s-sultânî, İbrahim Çelebi b. Mustafa er-Râcil, Mehmed Çelebi b. Şaban el-Bevvâbü’s-sultânî, Mustafa b. Mehmed, Mehmed b. Hanefi, Ali b. Abdullah, Süleyman b. Turgud ve gayruhüm mine’l-hâzırîn.