Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 104 Hüküm no: 66 Orijinal metin no: [11a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dimitri v. Yorgi’nin menzilini Maskalyo v. İstiranik’e satması Vilâyet-i Rumeli’nde Yenişehir kazâsı müzâfâtından Fener nâhiyesine tâbi‘ Tomyani nâm karye sâkinlerinden Dimitri v. Yorgi nâm zimmî meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Maskalyo v. İstiranik nâm zimmî mahzarında bi’t-tav‘ ve’r-rızâ ikrâr ve takrîr-i kelâm edip karye-i mezbûrede vâki‘ işbu akdin sudûruna değin silk-i mülk-i sahîhimde münselik ve münharıt olan emlâkden bir tarafı İstiranik v. Maskalyo mülküne ve bir tarafı İstaso v. ( ) mülküne ve bir tarafı müşterî-i mezbûr mülküne ve bir tarafı dereye müntehî ve mahdûd bir fevkānî beyti ve havluyu ve eşcâr-ı müsmire ve gayr-ı müsmireyi müştemil mülk menzilimi cümle-i tevâbi‘ ve levâhıkı ve kâffe-i menâfi‘ ve merâfıkı ile merkūm Maskalyo’ya on bin iki yüz fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen-i ma‘dûd edip mebî‘-i mezkûru mahallinde kabza müşterî-i merkūmu taslît eyledim ba‘de’l-yevm sâlifü’l-beyân menzil-i mezkûr Maskalyo’nun mülk-i müşterâ-yı sarîhidir keyfe mâ yeşâ ve yahtâr mutasarrıf olsun dedikde mukırr-ı mezbûrun vech-i mübeyyen üzre cârî olan ikrâr ve takrîrin el-mukarru lehü’l-mezbûr Maskalyo bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fî selhi Saferi’l-hayr li târihi’l-mezbûr. Şuhûdü’l-hâl: Süleyman b. Turgud, Mustafa b. Mehmed, Dimo v. Yani, Ester v. Yani, Kirici v. Dimitri, Şanalo v. İstati, Rizo v. Nikola, Hristo v. Nikola, Yorgi v. İstiranik, İstiranik v. Kiri, Angilaki [v.] Makarca ve gayruhüm mine’l-hâzırîn.