Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 106 Hüküm no: 69 Orijinal metin no: [11a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sultan Bayezid Vakfı’na ait tarlanın kullanım hakkının Seyyid Şeyh Mehmed Efendi b. Mahmud Efendi’ye verilmesi Umdetü’l-müderrisîni’l-kirâm kıdvetü’l-muhakkikīni’l-izâm zü’n-nesebi’t-tâhir ulü’l-fâhir es-Seyyid Şeyh Mehmed Efendi b. el-müvellâ el-merhûm el-mebrûr -ed-dâricü ilâ medârici rahmeti Rabbihi’l-Gafûr- Mahmud Efendi meclis-i şer‘-i hatîr-i lâzımü’t-tevkīrde takrîr-i kelâm edip merhûm ve mağfûrun-leh Sultan Bayezid Hân -tâbe serâhu cu‘ile’l-cennetü mesvâhu- hazretlerinin arâzi-i mevkūfesinden olup Hâslar kazâsında Terkos nâhiyesine tâbi‘ Karaahmedli demekle ma‘rûf karyede vâki‘ Söğüt tarlası demekle ma‘rûf tahmînen üç müd tohum istî‘âb eder bir tarafdan tarîk-i âm ve üç tarafdan cebel ile mahdûd bir kıt‘a tarla otuz seneden mütecâviz boz ve hâlî ve mu‘attal kalıp cânib-i vakf-ı mezbûra öşürden bir şey âid ve râci‘ olmamağla sâlifü’z-zikr tarlanın tasarrufu mahlûle olup tapuya müstahık olmağın bi’l-fi‘l evkāf-ı mezbûreye mütevellî olan fahrü’l-emâsil ve’l-a‘yân Sinan Çavuş b. Abdülmennân bi hasebi’l-kānûn resm-i tapusun alıp tasarrufu için yedime işbu sene tis‘a ve ışrîn ba‘de’l-elf Muharremü’l-harâmı’nın evâili ile müverrah hat ve hatmini müştemil tezkire vermişdir nazar olunup cânib-i şer‘den dahi temessük verilmesin taleb ederim dedikde müşârün-ileyh Efendi hazretlerinin ibrâz eylediği mûmâ-ileyh Sinan Çavuş’un hat ve hatmini müştemil tezkireye nazar olundukda tamâm-ı mazmûn-ı tezkire takrîrlerine muvâfık ve mutâbık bulunmağın cânib-i şer‘den dahi işbu hurûf ber sebîli’t-temessük ketb olundu. Hurrire fî gurreti Rebî‘ilevvel li seneti’l-merkūme. Şuhûdü’l-hâl: es-Seyyid Şeyh Mehmed b. Halil el-Müsta‘id, Ali b. Arslan el-Müsta‘id, Mustafa b. Mehmed, Mehmed b. Hanefi, Ali b. Abdullah, Süleyman b. Turgud, Yakub b. Kurd, Muharrirü’l-hurûf Mehmed b. Esedüddin.