Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 107 Hüküm no: 70 Orijinal metin no: [11b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Koçi Bey’in menzilini Rahime bt. Kasım’a satması Medîne-i Ebâ Eyyûb-i Ensârî -râdiye anhu Rabbühü’l-Bârî- mahallâtından Takyecibaşı mahallesi sâkinelerinden Ayşe bt. Koçi Bey tarafından husûs-ı âti’l-beyânı ikrâr ve takrîre vekîl olup vekâleti hasm-ı şer‘î-i câhid mahzarında Ömer Çelebi b. Hüseyin ve Abdülaziz b. Hüsam şehâdetleri ile şer‘an sâbite olan Mehmed b. Şaban nâm kimesne meclis-i şer‘-i hatîr-i lâzımü’t-tevkīrde işbu hâmiletü hâze’l-kitâb Rahime Hâtun bt. Kasım tarafından husûs-ı âti’l-beyânı tasdîka vekîl olup vekâlet-i hasm-ı şer‘î-i câhid mahzarında yine şâhidân-ı mezbûrân şehâdetleri ile şer‘an sâbite olan Mehmed b. Abdülganî mahzarında bi’l-vekâle ikrâr ve takrîr-i kelâm edip işbu akdin sudûruna değin müvekkile-i merkūme Ayşe’nin silk-i mülk-i sahîhinde münselik ve münharıt olan emlâkden olup mahalle-i merkūmede vâki‘ tarafeyni Fâtıma bt. Cafer mülküne ve bir tarafı Kâmile bt. Abdullah mülküne ve bir tarafı tarîk-i âma müntehî bir fevkānî beyti ve iki sofayı ve bir kileri ve şehnişîni ve matbah ve bi’r-i mâyı ve kenîfi ve ahırı ve zât-ı eşcâr-ı müsmire ve gayr-ı müsmireyi hâvî muhavvatayı müştemil mülk menzilini cümle-i tevâbi‘ ve levâhıkı ve kâffe-i menâfi‘ ve merâfıkı ile mezbûr Mehmed Çelebi’nin müvekkile-i merkūmesi Rahime Hâtun’a on beş bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i mebî‘-i mahdûd kıldı ba‘de’l-yevm sâlifü’l-beyân menzil-i mahdûd müvekkile-i merkūme Rahime’nin mülk-i müşterâ-yı sarîhidir keyfe mâ yeşâ ve hasbe mâ yürîd mutasarrıfe olsun dedikde vekîl-i mezbûrun vech-i meşrûh üzre cârî olan ikrâr ve takrîrin vekîl-i mezbûr diğer Mehmed bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’s-sâlis li târihi’l-mezbûr. Şuhûdü’l-hâl: Mehmed Efendi b. Hasan el-İmâm, Hüsam Efendi b. Abdurrahman el-Müezzin, Murtaza Halîfe b. Mehmed, Hacı Hamza b. Kasım, Hacı Kalender b. Abdullah, Mehmed Bey el-Cündî İbrahim Çelebi b. Mehmed er-Râcil, Ahmed Çelebi b. Rüstem er-Râcil, Hacı el-Barârî [el-Yesârî?], Ali b. Abdullah, Süleyman b. Turgud, Yakub b. Kurd, Mustafa b. Mehmed, Perviz b. Abdullah ve gayruhüm mine’l-hâzırîn.